Астана, BAQ.KZ тілшісі. Қытай Халық Республикасының Қазақстан Республикасындағы төтенше және өкілетті елшісі Чжан Сяо екі ел арасындағы қарым-қатынасқа байланысты жазылатын түрлі жазбаға қатысты пікір білдірді.
Дипломат Қытай мен Қазақстан арасындағы байланыстың маңызын айта келе, «Қытайдың Қазақстанды жаулап алғысы келетін геосаяси жоспары жоқ» деді.
«Қытай Қазақстан территориясының бөлігін жаулап алмақшы, Қытай Қазақстан территориясының бөлігін жаулап алғысы келеді» немесе «Қазақстан экономикасына айла-шаралар қолданады» деген «Қытайдың Қазақстанды жаулап алғысы келетін геосаяси жоспары бар» деп жазатындар бар. Мұндай жазбалар болды, қазір де бар. Бәрін жақсы білеміз. Бірақ мұндай жазбаларға мән берудің қажеті жоқ. Мұндайды жазатын не айтатын адамдардың не басы жоқ, не басы «жаман, лас», я болмаса біреудің тапсырмасымен жазатындар. Сондықтан бүгінгі көрме бір-бірімізді жақсы тануға, қарым-қатынасымызды одан әрі жақсартуға көмектеседі. Бүгінде өте маңызды мәдени-гуманитарлық жағымызды ыңғайластыруға ықпал етеді. Қазір екі елдің қарым-қатынасы өте жоғары деңгейде. Өткен жылы Нұрсұлтан Назарбаев Қытайда болды. 2019 жыл да екіжақты қарым-қатынас үшін ірі оқиғаларға толы болады деп ойлаймын», - деді елші Ұлттық музейде қытайлықтардың жаңа жыл мерекесіне орай ұйымдастырылған «Көктем мерекесі» көрмесінің ашылу салтанатында.
Дипломат Қазақстанның Қытай үшін маңыздылығы мен қос елдің арасындағы қатынастың мақсатына тағы тоқталды.
«Үнемі осындай сөздерді жазатындардың жазбасы күлкілі. Қытай өзінің мыңжылдаған тарихында ешкімнің территориясы өздігінен шабуыл жасамады, ешкімнің территориясын тартып алмады. Қытайлықтар ғасырлар бойы отбасында, көршілермен, қоғамда үйлесімде болуды дәріптеп келеді. Сондықтан тағы айтып кетемін, бұл жазбалар – біреудің тапсырысымен не «басы» жоқ адамның жазғаны. Қазақстан Қытай үшін стратегиялық серіктес, жақын көрші, ескі дос және біз екіжақты достық, теңқұқылы, екіжаққа да тиімді қарым-қатынас орнатуға ниеттіміз. Біздің басқа мақсатымыз не ойымыз жоқ және болуы мүмкін емес», - деді елші журналистерге.
Биыл Қытай жаңа жылы 2 ақпанда басталады. Осы айрықша күнге орай Қытай Халық Республикасының елшілігі мен Қазақстанның Ұлттық музейі бірлесе «Көктем мерекесі» фотокөрмесін ұйымдастырды.
Автор: Рахиля БЕКНАЗАРҚЫЗЫ
