Нұр-Сұлтан, BAQ.KZ тілшісі. Нұр-Сұлтан қаласының әкімдігінде мемлекет басшысы Қасым-Жомарт Тоқаевтың төрағалығымен елорданы одан әрі дамыту мәселелері жөнінде мәжіліс өтіп жатыр.
"Бас қала - егемен еліміздің негізгі әрі аса маңызды жобасы. Бүкіл әлемге Назарбаев моделі немесе Қазақстан жолы деп мойындалған стратегия дәл осы шаһардан басталды. Елбасы Нұрсұлтан Назарбаевтың бастамасымен салынған астана жылдан жылға дамып келе жатыр. Бүгінде Еуразияның жүрегінде орналасқан елордамыз ірі саяси-экономикалық, мәдени және білім орталығы болып қалыптасты", - деді Қазақстан президенті.
Мемлекет басшысы Нұр-Сұлтан қаласын әрі қарай дамытып, жаңа белестерге шығару алдағы негізгі міндеттердің бірі екенін баса айтты.
"Осы мәселелерді бүгін талқылаймыз. Алдымен бас қаламыздың бірқатар жетістігіне тоқталайын. Біріншіден, елордамыздың экономикасы соңғы жылдарда ойдағыдай дамығанын атап өту қажет. 21 жыл ішінде ішкі өңірлік өнім шамамен 5,5 есеге өсті. Бұған құрылысты күшейту, бизнесті дамыту және инвестиция тартудың арқасында қол жеткізілді. Қала экономикасына 9 трлн теңгеден астам инвестиция құйылып, 2018 жылы бюджетке 1,1 трлн теңге түсті. Шағын және орта бизнес халықтың әл-ауқатын арттыруға мүмкіндік берді", - деді Тоқаев.
Екіншіден, президент қала инфрақұрылымы қарқынды дамып келе жатқанын атап өтті.
"Астанамыз өмір сүруге қолайлы болу үшін жан-жақты абаттандырылды. Тұрғын үй және жол құрылысы, әлеуметтік сала инфрақұрылымы айтарлықтай дамыды. Нұр-Сұлтан қаласы мәдени әрі зияткерлік орталыққа айналды. Біз осы даму қарқынын бәсеңдетпеуіміз және де әрі қарай күшейтуіміз керек", - деді мемлекет басшысы.
Тоқаев, үшіншіден, елордамызда маңызды халықаралық шаралар мен кездесулер өткізіліп тұратынын айтты.
"Бұл үлкен жетістік. ЕҚЫҰ саммиті, Әлемдік және дәстүрлі діндер лидерлерінің съездері, халықаралық ЭКСПО көрмесі, жыл сайынғы Астана экономикалық форумы және жуырда өткен жаһандық инновациялық саммит соның айқын дәлелі. Нұр-Сұлтан қаласын халықаралық орталық ретінде әрі қарай дамыта береміз. Көп жұмыс атқарылды, бірақ мұнымен шектеліп қалмауымыз керек. Біз үшін маңызды мақсат - елордамыздың дамуын барлық бағыттар бойынша жаңа сапалы деңгейге көтеру", - деді Қазақстан президенті.
