Израиль қорғаныс министрі Израильдің оңтүстігіндегі ауруханаға Иран зымырандарының соққы беруінен кейін Иранның Жоғарғы көшбасшысы аятолла Әли Хаменейге тікелей ескерту жасады, деп хабарлайды BAQ.KZ тілшісі AP басылымына сілтеме жасап.
Бейершева қаласындағы Сорока медициналық орталығы мен Тель-Авив маңындағы бірнеше тұрғын үй кешені зардап шеккен. Израиль Денсаулық сақтау министрлігінің мәліметінше, кемінде 240 адам жараланған, оның төртеуі ауыр жағдайда. Сорока ауруханасынан 70-тен астам адам жеңіл жарақат алған.
Бұл адам (Хаменей) тірі қалмауы тиіс. Әскер бұл туралы нұсқау алған, – деп Қорғаныс министрі Исраэль Кац қатаң мәлімдеді.
Израиль Ирандағы Арак ауыр су реакторына соққы жасағанын растады. Әскерилердің айтуынша, шабуыл плутоний өндірісіне арналған негізгі компонентті жоюға бағытталған. Сонымен қатар, Натанз маңындағы ядролық нысан да нысанаға алынған. Иран ресми арнасы радиациялық қауіп жоқ екенін мәлімдеді.
Израиль премьер-министрі Биньямин Нетаньяху шабуылды айыптап, Иран билігіне қарсы жауап болатынын жеткізді.
Біз Тегерандағы тирания үшін толық жауап қайтарамыз, – деді ол.
Соғыс 13 маусымда Израильдің Ирандағы әскери және ядролық нысандарға күтпеген шабуылынан басталған. Иран оған жауап ретінде 400-ден астам зымыран мен жүздеген дрон ұшырды. Израильде кемінде 24 адам қаза тауып, жүздеген адам жараланған.
Сорока ауруханасына жасалған соққыдан кейін тек ауыр хәлдегі науқастар қабылданып жатыр. Ауруханада 1000-нан астам төсек-орын бар және Израильдің оңтүстігіндегі 1 миллионнан астам тұрғынға қызмет көрсетеді.
Израиль әскерилері шабуылдан бұрын Арак пен Хондаб қалалары тұрғындарын қауіпсіз аймаққа көшуге шақырған.
Иран өз кезегінде ядролық бағдарламасын тоқтатудан бас тартып, АҚШ-тың араласуы жағдайында ауыр салдар болатынын ескертіп отыр. Жоғарғы көшбасшы Хаменей АҚШ-тың талаптарын қабылдамайтынын мәлімдеді. Вашингтон бұл қақтығысқа тікелей араласу туралы соңғы шешімді әлі қабылдаған жоқ.
Израиль мен Иран арасындағы қақтығыстың жетінші күнінде Иран зымыраны Беэр-Шева қаласындағы Сорока медициналық орталығын зақымдағанын жазған едік.
Бұған дейін Израиль мен Иран арасындағы қақтығыс ушығып бара жатқанын жаздық.
Сондай-ақ Ұлттық банк төрағасы Таяу Шығыстағы жағдай ел экономикасына қалай әсер ететінін түсіндірді.
