Жетім балаларды тұрғын үй алу үшін есепке қою мерзімі қысқартылады

9 Наурыз 2022, 12:09
8067
Бөлісу:
Жетім балаларды тұрғын үй алу үшін есепке қою мерзімі қысқартылады

Нұр-Сұлтан, BAQ.KZ тілшісі. Мәжіліс «Қазақстан Республикасының кейбір заңнамалық актілеріне баланың құқықтарын қорғау мәселелері бойынша өзгерістер мен толықтырулар енгізу туралы» Заңның жобасын екінші оқылымда мақұлдады.     

Әлеуметтік-мәдени даму комитетінің төрағасы Жәмилә Нұрманбетованың сөзінше, заң жобасы 2021 жылғы 15 қыркүйекте бірінші оқылымда мақұлданды. 

Сондай-ақ құжат Қазақстанда баланың құқықтарын қорғау үшін тиісті құқықтық негіз құру мақсатында әзірленді. 

Заң жобасында балаларға қатысты кез келген зорлық-зомбылық көріністерінен, оның ішінде оларды отбасылық қатынастар, білім беру және ақпараттық кеңестік салаларында қорғау тетіктерін іске асыруға бағдарланған нормалар көзделген, - деп айтты депутат Жәмилә Нұрманбетова.

Ол құжатты қарау кезінде депутаттар бірқатар түзету енгізгенін жеткізді. Айтуынша, олар ерекше қажеттіліктері бар балалардың медициналық оңалту қызметтерін алуға қол жеткізуін кеңейту, жетім балалар мен ата-анасының қамқорлығынсыз қалған балаларды тұрғын үй алу үшін есепке қою мерзімін қысқарту ескерілген.

Кәмелетке толмағандар арасында жәбірлеу, буллинг көріністерін алдын алу мақсатында «жәбірлеу» ұғымы заңнамалық түрде бекітілді. Сондай-ақ Білім және ғылым министрлігінің кәмелетке толмағандар арасында буллингтің алдын алу қағидаларын әзірлеу жөніндегі құзыреті көзделген. Бұдан басқа, құқыққа қарсы контентке қарсы іс-қимыл тетігін, оның ішінде «онлайн-платформа», «лездік хабарлар алмасу сервисі» ұғымдарын бекіту арқылы регламенттеу жөніндегі нормалар ұсынылды, - деп түсіндірді Жәмилә Нұрманбетова.

Сонымен қатар депутат баяндағандай, білім беру саласындағы уәкілетті органға мемлекеттік білім беру ұйымдары педагогтерінің оқулықтар мен оқу-әдістемелік кешендерді таңдау қағидаларын әзірлеу және бекіту бойынша жаңа құзыреттер беруге, білім беру саласындағы уәкілетті органның орта білім беру ұйымдары үшін жекелеген пәндер бойынша базалық оқулықтар мен оқу-әдістемелік кешендерді айқындау әрі бекіту жөніндегі функцияларын бекітуге бағытталған нормалар көзделген.

Заң жобасы аясында қаралып жатқан мәселелердің кеңейгенін ескере отырып, депутаттар заң жобасының тақырыбын «Қазақстан Республикасының кейбір заңнамалық актілеріне баланың құқықтарын қорғау, білім беру, ақпарат және ақпараттандыру мәселелері бойынша өзгерістер мен толықтырулар енгізу туралы» деп өзгерту жөнінде ұсыныс енгізді. Бұл түзетулер барлық мүдделі мемлекеттік органдар, қоғамдық бірлестіктер өкілдерінің қатысуымен жұмыс тобының отырыстарында жан-жақты қаралды, - деп айтты депутат Жәмилә Нұрманбетова Мәжілісте.

Өзгелердің жаңалығы