Депутаттар Үкіметке атаулы әлеуметтік көмекті алып тастау туралы ұсыныс жасаған болатын. Шын мәнінде АӘК алынып тастала ма? Бұл сұраққа Премьер-министрдің орынбасары Алтай Көлгінов жауап берді, деп хабарлайды BAQ.KZ тілшісі.
Арнайы әлеуметтік қолдау төлемдері, яғни атаулы әлеуметтік қолдау бар. Ол жыл сайын жетілдіріліп келеді. Мысалы, бірнеше жыл бұрын аз қамтылған отбасыларға адам басына 6 мың теңге болса, қазір ол – 12 мың теңгені құрайды. Біздің мақсатымыз – мұқтаж азаматтар қолдау алуы керек, ал жұмыс істей аламын деген азаматтарға жұмыс істеуге мүмкіндік жасауымыз қажет. Осылайша, біз мемлекеттік бюджетке түсетін салмақты азайтып, нақты мұқтаж азаматтарға көмек береміз, - деп атап өтті Үкімет басшысының орынбасары Мұнай-газ жасау саласын дамыту форумынан соң тілшілерге берген сұхбатында.
Сонымен қатар ол АӘК тоқталуы мүмкін бе деген сұраққа жауап берді.
Жоқ, қазір ондай шешім қабылданбады. Депутаттардың ұсынысы берілді. Енді оны бірге талқылаймыз. Алайда мұқтаж азаматтарды көмексіз қалдырмауымыз керек. Бірақ жұмыс істегісі келетін адамдарға кәсіби қабілеті мен біліктілігін арттырып, оқыту керек болса, оқытып, жаңа жұмыс ұсынуымыз керек, - деді Алтай Көлгінов.
