Шетелдегі қазақтар ҚР Сыртқы істер министрлігінің бастамасымен «Отандастар қоры» коммерциялық емес акционерлік қоғамы ұйымдастырған «Отандастар Форумына» жиналып жатыр, деп хабарлайды BAQ.KZ тілшісі.
Форумға шетелдегі 200-ден астам қазақ ұйымдарының басшылары, белсенді және танымал тұлғалармен қатар, отандық ғылым, білім, мәдениет, спорт, бизнес, медиа, саясат, қоғамдық ұйымдар және басқа да салалардың көрнекті өкілдері мен белгілі қайраткерлері қатысады.
![Шетелдегі қазақтар Отандастар форумында бас қосты](/userfiles/images/TEMA0028.jpg)
Форумның мақсаты – шетелдегі қазақ ұйымдарымен өзара түрлі ынтымақтастық мәселелерін талқылау, еліміздің жаңа кезеңдегі мемлекеттік саясатымен және саяси-экономикалық реформаларымен, сондай-ақ ұлттық руханиятқа қатысты заманауи трендтермен таныстыру, шетелдегі қазақтарды қолдауда Қазақстанның жүргізіп отырған саясаты, шетелдегі қазақ жастарын Қазақстанда сапалы білім алу және өз қабілеттерін іске асыру, сондай-ақ елге көшіп келетін қандастарға мемлекет тарапынан қабылданып жатқан қолдау шаралары туралы ақпараттандыру.
![Шетелдегі қазақтар Отандастар форумында бас қосты](/userfiles/images/TEMA0041%20(2).jpg)
Айта кетейік, 1991 жылдан бері республикаға 1 млн 123,2 мың этникалық қазақ оралды. Ал, 2023 жылы 1 қыркүйектегі жағдай бойынша 16 026 этникалық қазақ тарихи отанымен табысып, қандас мәртебесін алған.
![Шетелдегі қазақтар Отандастар форумында бас қосты](/userfiles/images/TEMA0005%20(1).jpg)
Жыл басынан Қазақстанға келген қандастардың жартысы (53,6%) Өзбекстаннан, 19,6% – Қытайдан, 10,9% – Моңғолиядан, 7,8% – Ресейден, 5,9% – Түрікменстаннан және 2,2% басқа елдерден келген.
![Шетелдегі қазақтар Отандастар форумында бас қосты](/userfiles/images/TEMA0011%20(1).jpg)
Қоныс аударған этникалық қазақтар республиканың түрлі өңірлеріне қоныстанды. Оның ішінде, Ақмола, Абай, Қостанай, Павлодар, Шығыс және Солтүстік Қазақстан облыстарына қоныстандырылды.
![Шетелдегі қазақтар Отандастар форумында бас қосты](/userfiles/images/TEMA0014(6).jpg)
Жоғарыда аталған өңірлерде қоныстанған қандастарға көшуге субсидия түрінде мемлекеттік қолдау шаралары ұсынылады – бір мезгілде отағасына және отбасының әрбір мүшесіне 70 АЕК (241,5 мың теңге) мөлшерінде; тұрғын үй жалдауға және коммуналдық қызметтерге ақы төлеуге – бір жыл ішінде 15-тен 30 АЕК (51,7-ден 103,5 мың теңгеге дейін) мөлшерінде көмек көрсетіледі.
Айта кетейік, осыған дейін шетелден келген 200 қандасқа ұлттық ойындар көрсетілген еді.