Қытай Палестина-Израиль қақтығысында бейбітшілік пен әділеттілікті қолдады, деп хабарлайды BAQ.KZ.
ҚХР Төрағасы Си Цзиньпин бейнеконференция форматында өткен Палестина-Израиль мәселесі бойынша БРИКС-тің кезектен тыс саммитінде қақтығыс тараптарының қимылдарын дереу тоқтатудың маңыздылығын атап өтті.
Си Цзиньпин тараптарды бейбіт тұрғындарға қатысты кез келген зорлық-зомбылық пен шабуылды тоқтатуға, ұсталған бейбіт тұрғындарды босатуға, жаңа құрбандарының алдын алу және адамдарды одан да көп азаптан құтқару үшін шаралар қабылдауға шақырды.
Қытай басшысы өз баяндамасында гуманитарлық дәліздердің қауіпсіз және кедергісіз жұмысын қамтамасыз етіп, Газа секторының тұрғындарына гуманитарлық көмек көрсету керегін айтты.
Оның айтуынша, халықаралық қауымдастық қақтығыстың өршуіне және бүкіл Таяу Шығыс аймағының тұрақтылығына әсер етуіне жол бермеу үшін практикалық шаралар қабылдауы керек.
Си Цзиньпин Палестина-Израиль қақтығысының тұйық шеңберін бұзудың жалғыз нақты жолы мәселені «екі халыққа екі мемлекет» қағидаты негізінде шешу, Палестинаның заңды ұлттық құқықтарын қалпына келтіру және тәуелсіз Палестина мемлекетін құру екенін атап өтті.
Қытай бейбітшілікке қол жеткізу және Палестина мәселесін жан-жақты, әділ және тұрақты шешуге жәрдемдесу мәселесі бойынша халықаралық консенсус қалыптастыру үшін қысқа мерзімде неғұрлым беделді халықаралық бейбітшілік конференциясын шақыруға шақырады, - деді Си Цзиньпин.
Ол атап өткендей, Газа секторындағы қақтығыс екінші ай бойы жалғасып жатыр.
Қытай тарапы оның бейбіт тұрғындар арасында орасан зор шығын мен гуманитарлық апатқа әкеліп қана қоймай, сонымен бірге басқа аумақтарға таралу үрдісі бар екеніне қатты алаңдайды. Газа тұрғындарын күштеп көшіру немесе су, электр және отыннан айыру арқылы ұжымдық жазалауды тоқтату керек, - деді Си Цзиньпин.
Қытай, Бразилия, Ресей, Сауд Арабиясы, Мысыр, Иран, Біріккен Араб Әмірліктері, Эфиопия басшылары, Үндістан мен Аргентина сыртқы істер министрлері қатысқан саммитке ОАР президенті Сирил Рамафоса төрағалық етті.
