Мәдениет және спорт министрі Асхат Оралов Иранның Қазақстандағы Елшісімен кездесті, деп хабарлайды BAQ.KZ.
Иран Ислам Республикасының Қазақстандағы Төтенше және Өкілетті Елшісі Әли Акбар Джоукар бірқатар қызықты ұсыныстар айтты. Мысалы Қазақстан мен Иран футбол құрамалары арасында жолдастық матч өткізу туралы. Идея жақсы және мұндай кездесуді ұйымдастыруға дайынбыз. Туризм тақырыбына бөлек тоқталдық. Ирандық саяхатшылар арасында еліміздің танымалдылығын арттыру үшін Джоукар мырза биыл Қазақстанның Ирандағы мәдениет күндерін және елімізде ирандық артистердің қатысуымен іс-шара ұйымдастыруды ұсынды. Бұл елдеріміз арасындағы екіжақты қатынастарды дамытудағы маңызды қадам болуы мүмкін. Дегенмен, мәдениет күндеріне дайындық уақыт қажет етеді, - дейді министр.
Кездесу барысында Қазақстанға көне қолжазбаларды қалпына келтіру бағытында Иранның үздік мамандарын жіберу туралы ұсыныс айтылды. Сонымен қатар Елші мырза тарихи ескерткіштерді қалпына келтіру саласында тәжірибе алмасуға қызығушылық білдірді.
Мен өз кезегінде ирандық туроператорлар мен бизнесмендерді осы күзде Ақтауда өтетін халықаралық туристік форумға шақырдым. Елші мырза ирандық кәсіпкерлер бұл ұсынысқа қызығушылық танытады деп жауап берді, сонымен қатар Иран Ислам Республикасының туризм министрінің іс-шараға қатысуы мүмкін екенін мәлімдеді. Алдағы форум біздің және ирандық бизнеске ортақ тіл табуға және бірлескен күш-жігермен туристердің өзара ағынын арттыруға көмектесетініне сенімдімін. Сонымен қатар кинематография саласында екіжақты ынтымақтастықты бастау ұсындым. Менің ойымша, бұл салада үлкен әлеует бар. Сонымен қатар, заңнамалық деңгейде барлық қолайлы жағдайлар жасалған, - дейді Асхат Оралов.
Айта кетейік, мемлекет басшысы Қасым-Жомарт Тоқаевтың Иранға ресми сапары кезінде қос ел арасында 2022-2025 жылдарға арналған мәдени алмасу бағдарламасына қол қойылған болатын. Құжат өткізілетін фестивальдар туралы ақпарат алмасуды, тарихи-мәдени мұра, музей және кітапхана саласында тәжірибе алмасуды қамтиды.
