Алматы облысында, Күнгей Алатауының етегінде таңғажайып табиғи керемет бар – ол Қайыңды көлі. Бұл көлді алғаш көрген адам оның ерекше сұлулығына таңданбай тұра алмайды.
BAQ.KZ тілшісі Орталық Азия елдерінен және Қытайдың “Жэньминь жибао” газетінен келген журналистермен бірге Қайыңдының ерекше атмосферасын сезініп, табиғатына тамсанып қайтты.
Қайыңды – жай ғана тау көлі емес. Оның басты ерекшелігі – су астында тік тұрған шырша ағаштары.
Суға батқанымен, олар шірімей, ғасырдан астам уақыт бойы сол қалпында сақталған.
Бұл көрініс – ертегі әлемінен шыққандай: көл бетінен көтеріліп тұрған ағаш діңдері, мөлдір судың түбіндегі көлеңкелер – бәрі тылсым дүниеге жетелейді.
Көл 1911 жылы болған күшті жер сілкінісінің нәтижесінде пайда болған. Таудан түскен көшкін аңғарды жауып, жаңбыр мен бұлақ сулары жиналып, Қайыңды көліне айналды.
Көлдің суы – мұздай әрі ерекше мөлдір. Минералдарға бай су ағаштарды сақтап қалып, оларды табиғи “экспонатқа” айналдырған. Сондықтан су астындағы орман әлі күнге дейін шірімей тұр.
Жаз мезгілінде де судың температурасы +10 градустан аспайды. Сол себепті шомылуға лайық емес, бірақ қайықпен серуендеп, суретке түсіп, табиғатпен тыныш күйде сырласуға өте қолайлы.
Қайда орналасқан?
Қайыңды көлі Алматыдан шамамен 300 шақырым жерде, Көлсай көлдері ұлттық паркі аумағында орналасқан.
Ең жақын елдімекен – Саты ауылы. Сатыдан кейінгі 15 шақырым тау жолы – сәл қиын, бірақ жолдың соңы тұнып тұрған әсемдікке әкеледі.
Айта кету керек, “Қайыңды” деген атау көлдегі ағаштарға емес, жақын маңдағы Қайыңды ауылына байланысты қойылған. Ал көлдің өзінде негізінен шырша ағаштары кездеседі.
Қызықты деректер:
- Су астындағы орман – Қайыңды көлі әлемде сирек кездесетін табиғи құбылыстардың бірі. Бұл жерде 30 метрге дейінгі тереңдікте ағаштар тіке сақталып тұр.
- Мөлдір әрі суық су ағаштардың ғасырдан аса уақыт шірімей тұруына себеп. Бұл – табиғаттың нағыз кереметі.
- Көлсай ұлттық паркінің құрамында болғандықтан, мұнда аю, бұғы, түлкі, және сирек құстар мекендейді. Сондықтан экотуризмді ұнататындар үшін тамаша орын.
- Сүңгуге ресми тыйым салынған, бірақ кейде кәсіби сүңгуірлер су астындағы орманды зерттеуге рұқсат алады.
- Қайыңды – фотографтар мен кинорежиссерлердің сүйікті локациясы. Көлдің тұманды күндердегі көрінісі, су астындағы ағаштар мен тыныштық – шығармашылыққа шабыт береді.
