Тараз, BAQ.KZ тілшісі. Жамбыл облысында Қазақстанның 30 жылдығына орай көкпардан «Өнер көкпары» республикалық тұңғыш турнирі өтіп жатыр.
Турнирдің алғашқы ойынын «Әулие ата» мен «Құлагер-Шымкент» құрамалары өткізді.
Әулие ата Шымкентке жол береді. Себебі Шымкент бұған дейінгі дайындық кезіндегі жолдастық кездесулерде біраз қателіктер жіберген. Бүгін соған мықтап дайындалып келгені көрініп тұр. Ал Жамбыл жігіттері енді ғана дайындалып жүрген шабандоздар. Атқа да үйренісе алмай жатыр. Оның сыртында өзара үйлесім жоқ. Өз командам бүгін «Елорда» құрамасына қарсы ойнайды. Алланың бұйырғанын көреміз, – дейді әнші, «Дарын» мемлекеттік жастар сыйлығының иегері, «Алматы» өнер-көкпары құрамасының ойыншысы Бағлан Әбдіраимов.
Бағыланның болжамы тура келді. Ойынның алғашқы айналымын 2:0-мен аяқтаған шымкенттіктер, екінші айналымда да дес бермеді.
Ойын қорытындысы бойынша есеп – 3:2, шымкенттік шабандоздардың пайдасында.
«Әулие ата» құрамасына тиесілі екі салымды да ақын, асаба Бақтияров Мақсат салса, «Құлагер-Шымкент» құрамасының үш салымының екеуін фото-видео оператор Асатаев Еркебұлан, біреуін асаба Кашигов Қамбарбек салды.
Қазір алаңда Нұр-Сұлтан қаласының құрамасы «Елорда» командасы мен Алматы қаласының «Алматы» құрама командасы өнер тартыс өткізіп жатыр.
