Бас жаңалықтар
Түркістан облысында екпе салатын 80 пункт ұйымдастырылды
20 Сәуiр 2021, 15:25 189

Түркістан облысында екпе салатын 80 пункт ұйымдастырылды

Нұр-Сұлтан, BAQ.KZ. Түркістан облысы табиғи өсім бойынша елімізде көш бастап тұр. Жыл басынан бері өңірде бала туу көрсеткіші 6,5 пайызға өскен. Бұл туралы Түркістан облысы әкімдігінің баспасөз қызметі хабарлады.

Ал  сәби өлімі  27,7 пайызға азайған. Бұл туралы Қоғамдық денсаулық сақтау басқармасының кеңейтілген алқа отырысында мәлімденді. Түркістан облысы әкімінің орынбасары Арман Сәбитовтың төрағалығымен өткен отырыста саланың жыл басынан бергі жұмыс нәтижелері туралы облыстық Қоғамдық денсаулық сақтау басқармасының басшысы Марат Пашимов баяндады.

Былтыр өңірдің денсаулық сақтау саласына 13,7 млрд. теңге бағытталды. Басқарма басшысының айтуынша, бірінші кезекте ана мен бала, жансақтау, ота жасау және жедел жәрдем қызметін күшейтуге мақсат қойылған. Медициналық ұйымдардың материалдық-техникалық базасын жабдықтау мақсатында 2,5 млрд. теңгеге  205 дана медициналық техника сатып алынып, жабдықтау 79.2 пайызды көрсетті. Мемлекеттік-жекешелік әріптестік тетігі арқылы 9 фельдшерлік амбулаторияның құрылысы жүргізіліп, оның 5-уі пайдалануға берілсе, биыл төртеуі ашылады.

Сонымен қатар жедел медициналық көмек қызметі 122 автокөлік сатып алу арқылы күшейтілді, бұл көліктер жедел жәрдем паркін жаңартуға мүмкіндік берді. Аймақта дәрігерлердің біліктілігін арттыруға үздіксіз ерекше көңіл бөлініп келеді. Жалпы 2000 медицина қызметкері біліктілігін жоғарылатты. Облыс әкімінің орынбасары Арман Сәбитов COVID-19 індетіне қарсы вакцинация мәселесіне тоқталды. Вакцинаның жетіспеушілігі байқалмауы тиістігін ескертіп, осыған байланысты облыстың бас дәрігеріне нақты тапсырмалар берді.

Жалпы елімізде вакцина алу бойынша Түркістан облысы Алматы, Қарағанды облыстарынан кейін үшінші орында тұр. Өңірде екпе салатын 80 пункт ұйымдастырылған. 43 мыңнан астам адам қатерлі індетке қарсы екпені  қабылдады.


Фото: дереккөз
Загрузка...