Нұр-Сұлтан, BAQ.KZ. Бүгін елордадағы «Дәулет» спорт кешенінде Қазақстан Республикасы Ішкі істер министрінің Кубогі үшін жекпе-жектен халықаралық турнир өз мәресіне жетті, деп мәлімдеді ІІМ баспасөз қызметі.
Байрақты додаға Ресей Федерациясы, Біріккен Араб Әмірліктері, Әзірбайжан, Қырғызстан, Өзбекстан Республикаларынан жекпе-жек сайыс шеберлерінің жалпы командалары, сондай-ақ еліміздің Қарулы Күштері, басқа да күш құрылымдарының 13 командасы қатысқан болатын. Боз кілемде 140-тан астам жекпе-жек ұрысының шеберлері тоғыз салмақ дәрежесі бойынша күш сынасты.
Екі күнге созылған жарыс қорытындысы бойынша Ресей Федерациясы Ұлттық ұланының командасы қарсыластарын қапы қалдырып, жеңіске жетті. Ресейліктер осымен екінші мәрте турнир жеңімпазы атанып отыр. Бұған дейін олар 2017 жылы чемпион болған еді. Екінші орынды жалпылай есепте еліміздің Мемлекеттік күзет қызметінің командасы еншілесе, үшінші орынға Ұлттық ұланның құрамасы тұрақтады.
Командалық есептегі жеңімпаздарды Қазақстан Республикасының Ішкі істер министрі Ерлан Тұрғұмбаев марапаттады.
«Бүгін біз турнирдің ақтық кезеңінің көрермендері болдық. Біз жартылай финал және ақтық сындарды көрдік. Спортшылар сайыста жігер танытып, батылдықтары мен қайсар мінездерін көрсетті. Ішкі істер министрлігінің және өз атымнан рухтың күшімен, жақсы дене дайындығының арқасында жеңіске жеткен барлық спортшыларды бұл жетістіктерімен құттықтаймын», - деді Ерлан Тұрғұмбаев.
Жекпе-жек ұрысынан Халықаралық федерацияның президенті Сергей Астахов Қазақстанда ұйымдастырылатын аталмыш турнирдің деңгейі жоғары екенін айтып өтті. Сондай-ақ, болашақта осы турнир негізінде Әлем чемпионатына іріктеу кезеңін ұйымдастыру жоспары барын сөз етті.
Жекелей салмақ дәрежесі бойынша келесі спортшылар жеңіске жетті: 55 келіде – ҚР Қорғаныс министрлігінен Қазбек Сағын, 60 келіде – Ұлттық ұлан жауынгері Әлкен Төлегенов, 65 келіде – РФ Росгвардиясының жауынгері Дмитрий Казыгашев, 70 келіде – өзбекстандық спортшы Шахрудин Абдурахманов, 75 келіде ресейлік Александр Матмуратовқа қарсылас шақ келмеді. Ресейліктер 80, 85, 90 және 90-нан жоғары салмақ дәрежелерінде де барлығынан басым түсті. Сәйкесінше Нурмухамед Бесланеев, Джамал Ибрагимгаджиев, Роман Копылов және Салимгерей Расулов жеңімпаздар атанды.
Жеңімпаздар бағалы сыйлықтар және дипломдармен марапатталды. Росгвардияның өкілі Салимгерей Расулов «Үздік техникасы үшін» номинациясында жеңімпаз атанса, өзбекстандық Адилжон Сирожиддинов қарсыласты тез жеңгені үшін марапатталды.
Аталмыш турнирдің мақсаты - әскери қолданбалы спорт түрін насихаттай отырып, оны одан әрі дамыту және халықаралық деңгейдегі спортшылардың шеберлігін шыңдап, тәжірибе алмасу, халықаралық байланысты нығайту болып табылады.
