Нұр-Сұлтан, BAQ.KZ тілшісі. Бұл туралы Әділет министрі Қанат Мусин Үкімет отырысында айтты.
Мемлекет басшысы өзінің 2022 жылғы 16 наурыздағы Жолдауында саяси реформалардың 10 негізгі бағытын белгіледі. Бүгінгі күні осы Жолдауды іске асыру жөніндегі Жалпыұлттық жоспардың жобасы әзірленді. Ол нормативтік сипаттағы келесі шараларды көздейді, - деді Мусин.
Министр Конституцияға қандай өзгерістер енгізілетінін айтты.
Конституцияға:
- Президент өкілеттігі,
- оның лауазымда болуына байланысты шектеулер,
- Орталық сайлау комиссиясының, Есеп Комитетінің, Конституциялық Кеңестің төрағалары мен мүшелерінің саяси партиялардан шығуы,
- Парламент Сенаты мен Мәжілісін қалыптастыру тәртібі және оның функциялары,
- республикалық бюджеттің атқарылуын бақылау жөніндегі Есеп комитетін Жоғары Аудиторлық Палатаға қайта құру,
- мәслихаттарды қалыптастыру тәртібі,
- азаматтардың, Бас Прокурордың және адам құқықтары жөніндегі уәкілдің де өтініш жасауына мүмкіндік бере отырып, Конституциялық Сот құру,
- өлім жазасын жою туралы шешімді Конституцияда бекіту мәселелері бойынша өзгерістер енгізу.
Осы блок бойынша заң жобасын әзірлеу 2022 жылғы сәуірде жоспарлануда, - деді ол.
