Грузияның Гори қаласында Қазақстанның Құрметті консулдығы ашылды, деп хабарлайды BAQ.KZ.
Гори қаласы – Шида Картли муниципалитетінің стратегиялық орталығы. Екі елдің ынтымақтастығы дәстүрлі достық және өзара сенім рухында дамитындығын айтты қос тарап. Қазақстанның Құрметті консулдығы Рустави, Батуми және Боржомиде бар. Грузиядағы төртінші консулдық кеңсесі Гори қаласында ашылды. Құрметті консул – қарағандылық Ираклий Какаладзе.
Қазақстандықтар үшін Грузия өте қолайлы, өйткені ақыл-ой ұқсастығы мен өзара түсіністік бар. Сондықтан бұл тек демалысқа, туризмге емес, бизнеске де қатысты. Қазақстан – Грузиядағы алғашқы инвестордың бірі. Бұл елмен қызықты бірлескен жобаларымыз көп, - дейді Қазақстан Республикасының Гори қаласындағы Құрметті консулы Ираклий Какаладзе.
Грузиядағы құрметті консулдықтар қазақстандықтарға ғана емес, грузиндерге де консулдық-құқықтық көмек көрсетеді. Атап айтқанда, Қазақстанның бизнес, мәдениет, тарих және даму саласы туралы ақпарат береді.
Шида Картли аймағының әлеуеті зор. Экономикалық белсенділік жоғары әрі ауыл шаруашылығы өте дамыған. Қазақ достарымызбен жаңа экономикалық, туристік және спорттық іс-шараларды жоспарлаймыз деп үміттенеміз. Біздің елдеріміз арасында 30 жыл бұрын қалыптасқан қатынас енді дамудың жаңа серпініне ие, - дейді Шида Картли аймағының губернаторы Михаил Шакулашвили.
Қазақстан мен Грузия арасындағы экономикалық байланыстар белсенді дамып келеді. Горидегі Құрметті консулдық Грузия мен Қазақстан қалаларының бауырластығы туралы жоспарды жүзеге асыруға ниетті.
