Елордада халықаралық Олимпиада күніне орай спорт фестивалі өтеді

17 Маусым 2022, 11:33
1209
Бөлісу:
Елордада халықаралық Олимпиада күніне орай спорт фестивалі өтеді
Фото: astana.gov.kz

Нұр-Сұлтан, BAQ.KZ. 23 маусым күні сағат 12:00-де Нұр-Сұлтан қаласында Триатлон саябағында  Халықаралық Олимпиада күніне арналған спорттық мерекелік шара өтеді. 

Елорда тұрғындары мен қонақтары эстафеталық жарыстар, 3х3 баскетбол, текбол және үстел теннисі ойындары, сондай-ақ брейк-дансшылардың өнеріне тәнті болады және әртүрлі жастағы балалар арасында дзюдо мен таэквондодан көрсетілім жекпе-жегі ұйымдастырылатын шараға қатыса алады.

Сонымен қатар, Ұлттық құрама мүшелері мен Қазақстанның атақты спортшылары елорданың жас тұрғындарына шеберлік сабағын өткізеді. 

Атап айтсақ, бокстан 2012 жылғы Лондон Олимпиадасының чемпионы Серік Сәпиев, әйелдер күресінен үш дүркін Олимпиада жүлдегері Гюзель Манюрова, шорт-трекші, 2022 жылғы Бейжің Олимпиадасында Қазақстан құрамасының капитаны Абзал Әжғалиев, конькимен жүгіруден төрт құрлықтың чемпионы Екатерина Айдова, бокстан әлемдік бәсекелер жеңімпаздары ағайынды Айбек пен Нұрбек Оралбай және күрестен 2022 жылғы Азия чемпиондары Мәдина мен Жәмила Бақбергеновтер жас спортшылармен кездесіп, тәжірибесімен бөліседі.

Барлық қатысушы спорттық шаралар мен жарыстарға қатысып, викторинада сұрақтарға жауап бере отырып,  Ұлттық Олимпиадалық комитетінің естелік сыйлықтарын ұтып алуға мүмкіндік алады.

Сонымен қатар, биылғы жылы Ұлттық Олимпиадалық комитеті маусым айы бойына дәстүрге айналған акцияларды өткізеді. Бес олимпиада сақинасы бес құрлықты бейнелейтініндей, қазақстандықтардың спорттағы бірлігін білдіретін мерекелік эстафетаны Қазақстанның бес облысы алып өтеді. Атап айтқанда, еліміздің жаңа облыс орталықтарында Түркістан (Түркістан облысы), Семей (Абай облысы), Жезқазған (Ұлытау облысы), Қонаев (Алматы облысы) қалаларында ауқымды спорт фестивальдері өтеді.

Биыл елімізде Олимпиада күні 29-шы рет тойлануда. Қазақстандағы Олимпиадалық қозғалысқа қосылыңыз және осы күнді бізбен бірге атап өтіңіз! Olympic.kz сайтынан әлеуметтік желілердегі жарыстарға қатысып, #teamKZ командасымен бір толқында болыңыз!

Өзгелердің жаңалығы