Өнеркәсіп және құрылыс министрі Қанат Шарлапаев еліміздегі жылу желілерінің тең жартысы тозғанын айтты, деп хабарлайды BAQ.KZ тілшісі.
Жергілікті атқарушы органдардың деректеріне сәйкес жылу желілерінің жалпы ұзындығы шамамен - 13 мың шақырым.
Жылу желілерінің 53%-ы тозған және шамамен 7 мың шақырым ауыстыруды қажет етеді. Атап айтқанда, жылу желілерінің Павлодар облысында (Екібастұз – 91%, Павлодар – 83%), Ақмола облысы (Степногорск – 82%, Атбасар-76,5%), Солтүстік Қазақстан облысы (Петропавл-74%), Қостанай облысы (Арқалық – 68%, Рудный – 68%), Маңғыстау облысы (Ақтау – 71%) және Қарағанды облысы (Теміртау – 67%) тозығы жеткен, - деді Қанат Шарлапаев үкімет отырысында.
Министрдің сөзінше, 2030 жылға дейін жылу желілерінің тозуын 43%-ға төмендету керек.
Жыл сайын шамамен 350 шақырым жылу желілерін жөндеу қажет. Оған жылына шамамен 250 млрд теңге қаражат керек. Өткен жылы қаржыландыру көздері есебінен 336 шақырым жылу желілері жаңғыртылды, - дейді Шарлапаев.
Бұған дейін Үкімет басшысы Олжас Бектенов кейбір өңірдің жылыту маусымына дайын емес екенін айтты.
