«Астана-Щучье» тас жолындағы жаппай көлік апатында 11 адам зардап шеккен. Бұл туралы Ақмола облысының Полиция департаменті мәлімдеді.
Жол апаты салдарынан Бұланды аудандық ауруханасына түрлі жарақаттармен 11 адам жүгінді, олардың төртеуі ауруханаға жатқызылды, —делінген хабарламада.
Қазіргі уақытта жол учаскесінде зардаптарды жою жұмыстары жалғасып жатыр, жергілікті жерде полиция қызметкерлері, төтенше жағдайлар қызметі және ҚазАвтоЖол мамандары жұмыстарын жалғастырып жатыр.
Полицейлердің мәліметінше, елорда бағытында 400-ге жуық автокөліктен тұратын колоннаны алып жүру ұйымдастырылған.
Полиция қызметкерлері жүргізушілерден патрульдік полиция қызметкерлерінің талаптарын қатаң сақтауды және олардың жұмысына кедергі келтірмеуді сұрайды.
Жүргізушілерді ауа-райының жағдайын ескеруге, жолдарда өте сақ болуға және жағдайды жақсартқанға дейін осы бағытта жүруден бас тартуға шақырамыз, — деп хабарлады полициядан.
