Әшімбаев: 1 мамыр - татулық пен достықты дәріптейтін мейрам

1 Мамыр 2021, 11:51
2220
Бөлісу:
Әшімбаев: 1 мамыр - татулық пен достықты дәріптейтін мейрам

Нұр-Сұлтан, BAQ.KZ. Парламент Сенатының төрағасы Мәулен Әшімбаев Қазақстан халқының бірлігі күні мерекесіне орай Facebook әлеуметтік желісінде құттықтап, жазба қалдырды. 

Құрметті достар! Баршаңызды Қазақстан халқының бірлігі күнімен шын жүректен құттықтаймын! Елбасымыздың бастамасымен өмірге келген бұл күн – татулық пен достықты дәріптейтін және ырыс пен ынтымақты еселейтін ерекше мейрам. Біз бейбітшілік пен келісімді, тыныштық пен тұрақтылықты нығайту арқылы бүкіл әлемге елдіктің ерен үлгісін көрсеттік. Соның арқасында Тәуелсіздік тұғырын биіктетіп, толағай табыстарға қол жеткіздік, - деп жазды ол.

Төрағаның айтуынша, қазіргі таңда Мемлекет басшысы осы сабақтастықты сақтай отырып, барша қазақстандықты ортақ мақсат пен мүдде жолында жұмылдыруға баса мән беріп келеді. 

Бұл бүгінгідей күрделі кезеңде аса маңызды. Сондықтан береке-бірлігімізді арттыру бәріміздің абыройлы міндетіміз болуға тиіс. Сол арқылы барлық сын-қатерге төтеп беріп, Президентіміздің жаңғыру бағдарын табысты іске асырамыз. Бірлік күнімен құттықтай отырып, сіздерге зор денсаулық және амандық тілеймін! Еліміздің ертеңі жарқын, келешегі кемел болсын! Қазақ елі мәңгі жасай берсін!, - деп өз құттықтауын жолдады Әшімбаев.
Өзгелердің жаңалығы