Нұр-Сұлтан, BAQ.KZ. Қарағандыдағы жаңа кәсіпорын алғашқы 90 мың бетпердені әлеуметтік дәріханаларға жөнелтті, деп жазды Хабар24.
Алдағы күндері жекеменшік дәріханаларға да жеткізу жоспарда бар. Айта кетейік, жуырда ғана іске қосылған шағын цехта 10 адам еңбек етеді. Мұндағы заманауи өндірістік желі минутына 100 дана бетперде тігеді. Денсаулық сақтау басқармасының айтуынша, облыста бетперде тапшылығы болмайды, кәсіпорын толық қамтиды.Қазір өңірде короновирусқа қарсы шараларды кешенді түрде жүзеге асыру үшін арнайы штаб құрылған. Дәрі-дәрмек пен медициналық керек-жарақ алу үшін республикалық бюджеттен қосымша 39 миллион теңге қаржы бөлінді. Бұған қоса аймақтағы емдеу мекемелері жанынан 400 орындық арнайы госпиталь дайындалды. Қазіргі күні Оңтүстік Кореядан келген 12 адам карантинде, енді 14 күн дәрігерлердің бақылауында болмақ.
Тоқсан мыңнан астам маска дайындады осы бір жұманың ішінде. Соларды біз қазір әлеуметтік дәріханаларға жіберіп жатырмыз. Тапсырыс бойынша басқа да жекеменшік дәріханаларға жеткізеді, мемлекеттік және мемлекеттік емес мекемелерге тапсырыс бойынша жұмыс істейді, - деді денсаулық сақтау басқармасының бөлім басшысы Бибігүл Төлегенова.
