Жетісу облысының 6 станциясына медициналық пойыз барады

Жетісу облысының 6 станциясына медициналық пойыз барады
PHOTO
639

Нұр-Сұлтан, BAQ.KZ. Бүгін «Саламатты Қазақстан» мамандандырылған медициналық пойызы Жетісу облысының тұрғындарын Айнабұлақ станциясында қабылдай бастады.  Одан әрі пойыз 1-2 шілде аралығында Көксу, 3-4 шілде Егінсу, 5-6 шілде Бескөл, 7-8 шілде Жайпақ, 9-10 шілде Достық станцияларына барады. 

Медициналық пойыздың тәжірибелі мамандары жергілікті тұрғындарға мамандандырылған вагондарда тегін медициналық көмек көрсетеді.

Алматы облысының тұрғындарына дәрігерлер тегін консультациялар өткізіп, диагностика, емдік процедуралар, сондай-ақ алғашқы медициналық көмек көрсетті. Консультациялық-диагностикалық пойыздың мамандары 853 тұрғынды, оның ішінде 115 бала , 738 ересекті тексерді, ал дәрігерге қаралғандардың жалпы саны – 853.

Медицина қызметкерлері мүмкіндігінше көп пациент қабылдауға, оларды тексеруге, әрі емдеуге және қажет болған жағдайда аудандық немесе облыстық ауруханаларға жіберуге тырысады. Сонымен ең көп өтініш ЖПД, терапевт дәрігеріне келіп түсті: 636 пациент, бұдан әрі офтальмолог және құлақ дәрігеріне – 585 пациент, сондай-ақ хирург – 296 пациент. Медициналық пойыздың кабинеттерінде барлығы 395 ЭКГ, 432 УДЗ және 224 флюорография процедуралары жүргізілді. Сондай-ақ 111 кішігірім хирургиялық операция жасалды.

Жоғары санатты офтальмолог дәрігер Сәкен Жазитұлы Какпенов жобаға бірінші жыл қатысып жатқан жоқ. «2019 жылы мені «Жәрдем» медициналық пойызының дәрігерлері құрамында бір топ болып жұмыс істеуге әріптестерім шақырды. Сол кезде біз Қазақстанның оңтүстік өңірлерін жүріп өттік. Мен онда көру қабілетін жақсарту керек қаншама адамды көріп, нәтижесінде біразына көмектескеннен ұмытылмас әсер алдым. Бұл сапар аяқталған соң, біз глаукома және катаракта сияқты ауруларды ерте кезеңдерде анықтап, хирургиялық жолмен емдеу және көру қабілетін жақсартудың маңыздылығын түсіндік. Маған медициналық пойыздағы жұмыс тәжірибесі ұнайды, өйткені бұл офтальмологиядағы көптеген зиянды аурудың алдын алып, оны емдеуде үлкен пайда әкеледі. Екіншіден, біз үшін, яғни дәрігерлер үшін бұл – жұмыспен үйлесетін таза ауадағы ерекше демалыс», – деп медициналық пойыздағы жұмысынан алған әсерімен бөлісті.

Алматы облысының тұрғындары медициналық пойыздың қызметкерлеріне тегін көмек көрсеткені үшін алғыс білдірді. «Адамдарға көмектесетін осындай жоба үшін үлкен рақмет. Мен көршілерімнен медициналық пойыздың келгенін және денсаулығымды тексертуге мүмкіндік бар екенін естідім. Медициналық пойызда өз зертханасы мен жүректің УДЗ-сы, яғни біз үшін ең қажеттінің бәрі бар екен, – деді Байсерке ауылының тұрғыны Оралхан Саменсалиева.

 «Саламатты Қазақстан» медициналық пойызы  Жетісу облысынан кейін Шығыс Қазақстан, Абай, Павлодар, Ақмола, Солтүстік Қазақстан, Қостанай, Қарағанды және Ұлытау облыстарының станциялары бойынша бағытын жалғастырады.

Естеріңізге сала кетейік, «Жәрдем» медициналық пойызы 23 мамырда жолға шығып, алдымен Маңғыстау облысына барды. Қазіргі уақытта пойыз Ақтөбе облысында, онда 22 шілдеге дейін тұрады. Жалпы «Саламатты Қазақстан» медициналық пойызымен бірге олар еліміздің шалғай аудандарындағы 147 станцияны қамтиды. Екі медициналық пойыздың қозғалыс кестесі туралы нақты ақпаратты жобаның www.medpoezd.kz ресми сайтынан немесе 8 7172 60 45 94, 8 701 206 15 40 нөмірлері бойынша, сондай-ақ @medpoezd.kz  Instagram парақшасынан біле аласыздар. 

Жоба «Самұрық-Қазына» АҚ компаниялар тобының атынан «Samruk-Kazyna Trust» әлеуметтік жобаларды дамыту қоры ҚР Денсаулық сақтау министрлігінің қатысуымен, «Қазақстан Темір Жолы» ҰК АҚ жанындағы «Әлеуметтік жобалар қоры» корпоративтік қорымен бірлесіп іске асырылуда.


Фото: ашық дереккөз