Нұр-Сұлтан, BAQ.KZ тілшісі. Бұл туралы Парламент Сенат төрағасы Мәулен Әшімбаев «Тәуелсіздік ұрпақтары» республикалық жастар форумында айтты.
Сенат спикері атағандай, уақыт өткен сайын таза ауа, су, құнарлы өнімдердің тапшылығы айқын сезіліп келеді.Бұдан былай қоршаған ортаны қорғаудың маңызы арта береді. Табиғатпен үнемі үйлесімде болу – біздің бабаларымыздың өмірлік философиясы. Біз осындай көзқарасты қалпына келтіруіміз керек. Жер – бүкіл адамзатқа, бізге дейін және бізден кейінгі ұрпаққа ортақ. Ал оның мүмкіндігі шектеулі, - деді Әшімбаев.
Әшімбаевтың айтуынша, қоршаған ортаны қорғау – ортақ міндет.Егер біз қазіргідей, есепсіз тұтыну дағдысын жалғастыра берсек, Жердің ресурстары ұзаққа жетпейді. Халқымыз «судың да сұрауы бар» дейді. Сондықтан табиғатты қорғау өмірлік ұстанымға айналуға тиіс. Президентіміз Қасым-Жомарт Кемелұлы Тоқаев биылғы Жолдауында осы бағытқа баса мән берді. Жалпы еліміздің алдында тұрған экологиялық мақсат-міндеттер – Мемлекет басшысының үнемі басты назарында, - деді ол.
Оның айтуынша, сондықтан дұрыс құндылықтарды қалыптастыруымыз өте маңызды.Осы жауапкершілікті бәріміз сезінуіміз керек. Сондықтан жастарымыз экологиялық құндылықтарды бойына сіңіріп өсуге тиіс. Тұтынушылық идеологиясынан бас тарту қажет. Пандемияға дейін тұтыну мәдениеті бұрын-соңды болмаған деңгейге жетті. Тіпті тұтыну өмірдегі ең басты мақсатқа айналды десек те, артық бола қоймас. Жастар арасында да осындай үрдіс қалыптасқаны жасырын емес. Толассыз тұтыну тоқырауға, құндылықтардың құлдырауына әкеліп соғады, - деді Сенат төрағасы.
Ол үшін жанашырлық, жауапкершілік, сабырлық, мейірімділік сияқты адамгершілік қасиеттерді кеңінен дәріптеген жөн, - деді Мәулен Әшімбаев.
