Жамбыл облысының креаторлары Астанада 15 млн теңгеден астам өнім сатты

Астанадағы Qazaq Creative Hub алаңында Жамбыл облысының «Асқақ рухты Әулиеата» креативті жәрмеңкесі аяқталды. Іс-шара Мәдениет және ақпарат министрлігінің қолдауымен Creative Aimaq республикалық жобасы аясында ұйымдастырылды.

Екі күнге созылған жәрмеңкеге 6 мыңға жуық адам қатысты. Нәтижесінде Жамбыл облысының креаторлары 15 млн теңгеден астам өнім сатты.

Жәрмеңкеде қолөнер бұйымдары, ұлттық киімдер, зергерлік әшекейлер, авторлық брендтер, кітаптар, картиналар, мүсіндер мен фототуындылар ұсынылды.

Сондай-ақ келушілер ұлттық мәдениет пен заманауи цифрлық технологияларды ұштастырған IT-жобалармен, соның ішінде жасанды интеллект негізінде әзірленген жобалармен танысты.

Creative Aimaq жобасын келесі болып Қызылорда облысы жалғастырады. Өңірдің креативті жәрмеңкесі 12-13 қыркүйекте өтеді.