Зеленский ертең «тыныштық режимі» енгізілетінін мәлімдеді

Украина президенті Владимир Зеленский 6 мамырға қараған түні сағат 00:00-ден бастап «тыныштық режимі» енгізілетінін мәлімдеді. Бұл туралы ол өзінің Telegram арнасында жазды, деп хабарлайды BAQ.KZ DW порталына сілтеме жасап.

Зеленскийдің айтуынша, Украина адам өмірін кез келген мерекелік іс-шаралардан жоғары қояды. Осыған байланысты 5 мамырдан 6 мамырға қараған түні түн ортасынан бастап атысты тоқтату режимін бастау ұсынылған.

Зеленский бұл қадамды «айна қағидаты» бойынша жүзеге асатынын айтып, егер қарсы тараптан да дәл осындай әрекет жасалса, режим сақталатынын жеткізді.

Сонымен қатар Украина басшысы Киев тарапына 9 мамырға байланысты ресми атысты тоқтату туралы нақты ұсыныстар түспегенін атап өтті. Ол Ресей билігін соғысты тоқтатуға бағытталған нақты қадамдар жасауға шақырды.

Бұған дейін Ресей Қорғаныс министрлігі 8 және 9 мамыр күндеріне байланысты біржақты бітім жариялағанын хабарлаған болатын. Алайда тараптар бір-бірін шарттарды бұзуы мүмкін деп айыптап, қауіп-қатер туралы мәлімдемелер жасаған.

Сарапшылардың пікірінше, мереке күндеріне байланысты жарияланған бұл мәлімдемелер аймақтағы шиеленістің әлі де жоғары деңгейде сақталып отырғанын көрсетеді.