Нұр-Сұлтан, BAQ.KZ. Азаматтардың қауіпсіздігі үшін карантин кезеңінде елордалық жұмыспен қамту орталығының барлық мемлекеттік қызметі eGov.kz порталы, call-орталық, электрондық пошта және ұялы байланыс құралдары арқылы онлайн режимде көрсетіледі, деп хабарлады елорда әкімдігінің ресми сайты.
Елорда билігі қала тұрғындарын жұмысқа орналастыру бойынша кешенді шаралар қабылдады. Жұмыс іздеп жүрген азаматтар онлайн-кеңес ала алады.
Сall-орталық нөмірлері орталықтың www.cz.astana.kz ресми сайтында қолжетімді. Сондай-ақ, "Еңбек" бағдарламасы аясында жұмыспен қамту орталығы жұмыссыз азаматтарға тұрақты жұмысқа орналасу мүмкіндігі бар "жастар тәжірибесі", "әлеуметтік жұмыс орны", "қоғамдық жұмыстар" бағдарламаларына қатысуды ұсынады.
Сонымен қатар, жұмыс берушілермен "Электрондық еңбек биржасы" интернет-порталында, жеке кабинет арқылы бос жұмыс орындарын жинау және бос жұмыс орындарын толтыру бойынша белсенді жұмыс жүруде. ЭЕБ "Жұмыс" www.enbek.kz порталы үйден шықпай-ақ, онлайн режимінде жұмыс іздеуге мүмкіндік береді. Ол үшін тіркеліп, өзіңіздің жеке кабинетіңізді құрып, түйіндемеңізді орналастыруыңыз керек.
ТЖ енгізілген сәттен бастап 335 азаматқа жұмысқа орналастыру бойынша шаралар көрсетілді. Оның ішінде 154 адам тұрақты жұмысқа орналастырылды. Жастар тәжірибесінен өтуге 29 адам жіберілді (жыл басынан бері 194), 143 адам "Қоғамдық жұмыстар" бағдарламасына қатысты (жыл басынан бері 995), "Әлеуметтік жұмыс" орындарына 9 адам жұмысқа орналастырылды (жыл басынан бері 61 адам). 2020 жылдың басынан жаңа бизнес-идеяларды іске асыру үшін мемлекеттік грант бөлу жөніндегі Комиссиямен 59 грант мақұлданып, оның 47-сі берілді.
