Су тасқынынан зардап шеккен Ақтөбе облысының тұрғындары Су ресурстары және ирригация министріне көмек алу және су тасқыны жағдайы туралы сұрақтарын қойды, деп хабарлайды BAQ.KZ.
Су ресурстары және ирригация министрі Нұржан Нұржігітов Ақтөбе облысына барды. Министр Ақтөбе су қоймасын аралап, тасқын суын өткізу барысымен танысты.
Нұржан Нұржігітов Мемлекет басшысының су тасқынынан зардап шеккен тұрғындарға көмек көрсету жөніндегі тапсырмасы туралы айтып берді.
Сондай-ақ, тасқын суын жіберу бойынша іс-шаралардың барысы туралы баяндады.
«Қазсушар» РМК, жергілікті атқарушы органдар мен төтенше жағдайлар департаментінің қызметкерлері бірлесе жұмыс істеп, тасқын суын қауіпсіз өткізуді қамтамасыз етті. «Қазгидромет» болжамы бойынша, 30 наурыздан 5 сәуірге дейін Ақтөбе су қоймасына 210 млн текше метр, Қарғалы су қоймасына 180 млн текше метр су келуі мүмкін. Сондықтан біз су қоймалары өзара байланыста жұмыс істеуін қамтамасыз етуіміз керек. Қазір біз «Қазсушар» РМК жүргізіп жатқан жұмысты талдап, қажетті шешім қабылдаймыз, – деді Су ресурстары және ирригация министрі Нұржан Нұржігітов.
