Сенаторлар сарапшылармен сот жүйесін реформалау барысын талқылады

Сенаторлар сарапшылармен сот жүйесін реформалау барысын талқылады
356

Сенаттың Конституциялық заңнама, сот жүйесі және құқық қорғау органдары комитетінің депутаттары М.Нәрікбаев атындағы КАЗГЮУ университетінде өткен дөңгелек үстел отырысында Жоғарғы сот өкілдерімен, ғылыми қызметкерлермен, сарапшылармен және заңгерлермен бірге сот жүйесін одан әрі реформалауға қатысты мәселелерді талқылады, деп хабарлайды BAQ.KZ.

Комитет төрағасы Владимир Волков өзінің кіріспе сөзінде Сенат жанынан құрылған жұмыс тобы Жоғарғы Сот ұсынған сот жүйесін реформалау жөніндегі 10 қадамды жан-жақты талқылау бойынша ауқымды жұмыс жүргізгенін атап өтті.

Реформалардың негізгі мәні азаматтардың сотқа деген сенімін арттыру болды және солай болып қала береді. Депутаттар соңғы 4 жылда сот жүйесін жаңғыртуға орай 30-дан астам заң қабылдады. Енгізілген түзетулердің арқасында осы жылдың басынан бастап басқа салалардан, оның ішінде корпоративтік сектордан келген 50-ге жуық заңгер-практик судья болды, – деді Владимир Волков.

Қатысушылар шара барысында сот жүйесін реформалау мәселелерін талқылады. Сенаторлардың айтуынша, өзгерістер сот процесіндегі тараптардың тартысын жақсартуға, судьялардың тең мәртебесін қамтамасыз етуге, сол арқылы олардың сот төрағаларына тәуелділігін төмендетуге, сондай-ақ судьялардың өздері сот төрағалары мен сот алқалары төрағаларын сайлау сипатын енгізуге мүмкіндік береді.

Сенатор Қанатбек Сафинов дөңгелек үстел жұмысын жүргізе отырып, Сенатта жұмыс топтарының 14 отырысы өткенін, онда ұсынылған сот реформасының ерекшеліктері егжей-тегжейлі қаралғанын атап өтті.

Мемлекеттік органдардың ұстанымдары да пысықталып, заңгерлер қауымдастығынан, құқықтанушылар мен қоғамдық ұйымдардан ұсыныстар алынды. Біз реформаның жұмыс топтарында талқыланбаған басқа да қадамдарын да талқылау қажеттігін айттық, – деді сенатор Сафинов.

Отырыс барысында Жоғарғы Соттың әкімшілік істер жөніндегі сот алқасының төрағасы Аслан Түкиев, КАЗГЮУ университетінің Басқарма төрағасы Талғат Нәрікбаев және басқалар да баяндама жасады.

Сенатор Владимир Волков отырысты қорытындылай келіп сот жүйесін реформалау жұмыстары жалғасып жатқанын айтты және Комитет кездесу барысында ұсынылған бастамалар мен идеяларды жан-жақты зерделеп, алдағы жұмыс топтарында қарайтынын атап өтті.

Қысқа да нұсқа. Жазылыңыз telegram - ға
Өзгелердің жаңалығы