Сайлау процесі заңдылығының сақталуын қадағалау жалғасуда

10 Қаңтар 2021, 13:37
1949
Бөлісу:
Сайлау процесі заңдылығының сақталуын қадағалау жалғасуда

Нұр-Сұлтан, BAQ.KZ тілшісі. Бұл туралы бүгін ҚР Президенті жанындағы Орталық коммуникациялар қызметі алаңында өткен онлайн брифинг барысында Бас прокурордың аға көмекшісі Азамат Сарғазин айтты.

ҚР сайлау туралы конституциялық заңына сәйкес, сайлау болатын күні және оның қарсаңындағы күні кез келген үгітке тыйым салынған. Алайда кеше тыныштық күні Алматы қаласында Б. есімді азамат «Ақжол» партиясын қолдау үшін анонимдік үгіттеу материалдарын тарату арқылы үгіт жүргізген. Аталған факт бойынша Алматы қаласының прокуратурасы оны қысқартылған өндіріс тәртібінде, яғни кінәсын мойындауына байланысты материалдарды сотқа жолдамай, Әкімшілік-құқық бұзушылық туралы кодекстің 102 және 113-баптары бойынша жалпы 20 АЕК есебінде айыппұл түріндегі әкімшілік жауапкершілікке тартты, - деді Азамат Сарғазин. 
Оның сөзінше, кешегі күн бойынша прокуратура органдарына 2 өтініш келіп түсті. Оның бірі – Бас прокуратураға, екіншісі – Нұр-Сұлтан қаласы Есіл ауданы прокуратурасына.
Нақты айтқанда, Бас прокуратураға Алматы қаласының тұрғыны дауыс беру кабиналарында перделердің болмауына байланысты дауыс беру құпиясын бұзудың алғышарттары туралы өтінішпен жүгінді. Аталған өтініш құзыреті бойынша Алматы қаласының аумақтық сайлау комиссиясына жолданды. Сол күні елорданың Есіл аудандық прокуратурасына Қазақстан халық партиясы мүшесінен өтініш келіп түсті. Онда ол партиялық тізімге енгізілмегендігімен келіспейтінін білдірді. Прокуратура оған партияның осы шешіміне сотқа шағымдану құқығын түсіндірді. Өйткені, бұл партияның ішкі актілерімен реттеледі, - деді ол.

Азамат Сарғазин брифинг барысында бүгін таңнан бастап осы уақытқа дейін прокуратура органдарына қандай да бір, оның ішінде дауыс беру шарттарын бұзу туралы шағымдар мен арыздар түспегенін жеткізді.

Дегенмен, жекелеген тұлғалар әлеуметтік желілерде жасанды резонанс тудыру мақсатында «бүгін орын алған» деп сайлау заңнамасын бұзушылықтар туралы жалған материалдар таратуда. Біз олардың дұрыстығын тексердік. Олардың қазіргі сайлау науқанына қатысы жоқ. Мысалы, WhatsApp мессенджері арқылы сайлау учаскелерінің бірінде сайлау комиссиясының мүшелері алдын ала қол қойылған бюллетеньдер табылған бейнежазба таралған. Бұл бұған дейін өткізілген сайлау кезінде Нұр-Сұлтан қаласындағы сайлау учаскелерінің біріндегі ескі жазба екені анықталды, - деп атап өтті Бас прокурордың аға көмекшісі. 

Сондай-ақ Азамат Сарғазин Facebook әлеуметтік желісінде Алмас Байқадамов деген пайдаланушы «бүгін сайлау комиссиясының мүшесі Қазақстанда бұрмалау басталды» деген пікірмен жәшікке бюллетеньдерді лақтырудың бейнежазбасын орналастырғанын айтты.
Алайда материалдарды зерделеу нәтижесінде бұл бейне Ресей елді мекендерінің біріндегі сайлау учаскесінде жасалғаны анықталды. Сондықтан БАҚ немесе телекоммуникация желілерін пайдалана отырып, қоғамдық тәртіпті бұзу қаупін тудыратын көрінеу жалған ақпарат таратқаны үшін ҚК-тің 274-бабы бойынша қылмыстық жауапкершілік көзделгенін еске салғым келеді. Сайлау процесі заңдылығының сақталуын қадағалау жалғасуда, - деді ол.


Өзгелердің жаңалығы