Бүгін Цифрлық даму, инновациялар және аэроғарыш өнеркәсібі министрі Бағдат Мусин Қостанай облысына жұмыс сапарымен барды, деп хабарлайды BAQ.KZ.
Сапар басында Қостанай облысының әкімі Құмар Ақсақаловпен кездесу өткізілді, оның аясында облыстың елді мекендерін мобильді Интернетпен және талшықты-оптикалық байланыс желісімен қамтамасыз ету жөніндегі Жол картасына қол қойылды.
Цифрландыру министрінің мәліметінше, қазіргі таңда облыс инновациялық өнім көлемі бойынша 1-орында тұр, бұл 529 миллиард теңгені немесе елдің жалпы көлемінің 28%-ін құрайды. Бағдат Мусин Қостанай облысында инновациялық өнімді дамыту экономикалық әлеуетті жақсартуға, инвестицияларды тартуға, жұмыс орындарын құруға, бәсекеге қабілеттілікті арттыруға және өңірдегі технологиялық прогресті ынталандыруға ықпал ететінін атап өтті.
«2023 жылғы 29 маусымда «Astana Hub», Қостанай облысының әкімдігі және ақпараттық технологиялардың дамуын жеделдетудің негізін қалаған А. Байтұрсынов атындағы Қостанай Өңірлік университеті арасында ынтымақтастық туралы Меморандумға қол қойылды. Сонымен қатар, биыл Қостанай және Арқалық қалаларында 2 жаңа ХҚКО ашылды», - деп атап өтті министр.
Өз кезегінде облыс әкімі Құмар Ақсақалов өңірдің инвестициялық тартымдылығын арттыру үшін цифрландыру және инновацияларды енгізу мәселелеріне көп көңіл бөлінетінін айтты. Оның айтуынша, соңғы 5 жылда осы бағытта 48 млрд. теңгеге 300-ге жуық цифрлық жоба іске асырылған, оның 37 млрд. теңгесі – жеке инвестициялар.
«Мысалы, «Соколов-Сарыбай тау-кен байыту өндірістік бірлестігі» АҚ-да «Қоржынкөл және Соколов-Сарыбай кен орындарында «Ақылды карьер» автоматтандырылған жүйесін енгізу» жобасы іске қосылды, инвестиция 1 млрд. теңгеден астам қаржыны құрайды», – деді Қостанай облысының әкімі.
Кездесу қорытындысы бойынша Қостанай облысының елді мекендерін мобильді Интернетпен және талшықты-оптикалық байланыс желісімен қамтамасыз ету жөніндегі Жол картасына қол қойылды. Министр ведомство KazSat спутнигі бойынша Қостанай облысының 43 ауылын Интернетпен қамтамасыз етуді, 2025 жылдың соңына дейін 87 5G базалық станциясын орнатуды, Starlink технологиясы арқылы 180 ауылдық мектепті Интернетке қосуды және 325 ауылға талшықты-оптикалық байланыс желісін жеткізуді жоспарлап отырғанын айтты.
Бағдат Мусин сондай-ақ, Жол картасы шеңберінде 226 ауылда, соның ішінде 161 ауылдық елді мекенде мобильді Интернеттің сапасын жақсарту үшін жергілікті атқарушы органдар есебінен антенна-діңгек құрылыстарын салу көзделіп отырғанын атап өтті.
