Қорғаныс министрлігі Атырау аспанында ұшқан жойғыш ұшаққа қатысты түсініктеме берді

Атырау тұрғындары қала аспанында айналып ұшқан әскери жойғыш ұшақты байқады. Ұшақ түсірілген бейнежазбалар әлеуметтік желілерде жылдам тарап, қолданушылар арасында қызу талқыланды.

Оқиғаның мән-жайын Қазақстанның Қорғаныс министрлігі түсіндірді.

Ведомствоның мәліметінше, қала үстінде Қазақстан Әуе қорғанысы күштерінің Су-30СМ әскери ұшағы жоспарлы оқу-жаттығу ұшуын орындаған.

Қорғаныс министрлігі мұндай ұшулар ұшу құрамының даярлығын қамтамасыз ету мақсатында тұрақты түрде өткізілетінін атап өтті.

24 маусым күні Атырау қаласының үстінде Қазақстан Әуе қорғанысы күштерінің Су-30СМ ұшағы жоспарлы оқу-жаттығу ұшуын орындады. Мұндай ұшулар ұшу құрамының даярлығы аясында тұрақты түрде өткізіледі. Олар ұшқыштардың кәсіби дағдыларын сақтауға және авиациялық техниканы қауіпсіз пайдалануды қамтамасыз етуге қажет, – деп мәлімдеді министрліктің баспасөз қызметі.

Министрлік тұрғындарды алаңдамауға және тек ресми, тексерілген ақпаратқа ғана сенуге шақырды.