Жібек Құламбаева Чилидің Колина қаласында өткен WTA 125 турнирінің жұптық сынында жеңімпаз атанды. Бұл туралы Sports.kz хабарлады.
Финалда Құламбаева мен словениялық Вероника Эрьявец турнирдің бірінші нөмірлі жұбы – украиналық Валерия Страховая мен ресейлік Анастасия Тихоноваға қарсы ойнады. Қазақстандық-словениялық дуэт 6:4, 6:3 есебімен жеңіске жетті. Матч 1 сағат 16 минутқа созылды.
Финалға дейін Құламбаева мен Эрьявец ширек финалда түркиялық Ипек Өз бен грекиялық Деспина Папамихаилді 6:0, 6:2 есебімен ұтты. Ал жартылай финалда австралиялық Теника Макгиффин мен Александра Осборннан 7:6 (9:7), 3:6, 10:4 есебімен басым түсті.
Турнирдің жүлде қоры 115 мың долларды құрады. Жұптық сындағы жеңісі үшін Құламбаева мен Эрьявец 6 мың долларды өзара бөлісіп, әрқайсысы рейтингке 125 ұпайдан қосады.
Дүйсенбі күні жаңартылған WTA жұптық рейтингінде Құламбаева 78-орынға көтеріледі деп күтілуде. Бұл – теннисшінің жеке рекорды.
Жекелей сындағы WTA рейтингінде қазақстандық спортшы осы аптада 378-орында тұр.