Антикор ЭЫДҰ-ның жемқорлыққа қарсы күрес және парасаттылық жөніндегі жаһандық форумына қатысып жатыр, деп хабарлайды BAQ.KZ.
Экономикалық ынтымақтастық және даму ұйымының стандарттарын енгізу жемқорлыққа қарсы саясаттың негізгі міндеттерінің бірі.
Сыбайлас жемқорлыққа қарсы қызмет төрағасы Асхат Жұмағали бастаған делегация ЭЫДҰ-ның жемқорлыққа қарсы күрес және парасаттылық жөніндегі жаһандық форумына, сондай-ақ жемқорлыққа қарсы ведомстволар (SPIO) басшыларының отырысына қатысып жатыр.
Жаһандық форум әлемнің 90-нан астам елі қатысатын жыл сайынғы жемқорлыққа қарсы іс-шараның жетекші шарасы болып табылады.
Іс-шаралар аясында Асхат Жұмағали агенттіктің қызметі және жемқорлыққа қарсы іс-қимыл бойынша қабылданып жатқан шараларды таныстырды.
Асхат Жұмағали жемқорлыққа қарсы саясат Тұжырымдамасын іске асыру, жемқорлықтың алдын алу, оның ішінде жемқорлыққа қарсы мәдениет пен парасаттылықты қалыптастыру, талдау, бизнесті қорғау, активтерді қайтару және заңнамалық бастамаларды енгізу бойынша жүргізіліп жатқан жұмыстар туралы айтып берді.
Сондай-ақ, форум аясында қазақстандық делегацияның ЭЫДҰ хатшылығының өкілдерімен кездесуі өтті, онда парасаттылық қағидаттары мен тетіктерін нығайту, ЭЫДҰ стандарттарын енгізу тиімділігін бағалау саласындағы одан әрі ынтымақтастық мәселелері талқыланды.
Қазіргі уақытта Қазақстан ЭЫДҰ-ның Ыстамбұл іс-қимыл жоспары мониторингінің төрт кезеңінен сәтті өтті. Бесінші раундты бағалау ағымдағы жылдың сәуір-қазан айлары аралығында жүргізіледі.
Айта кету керек, біздің еліміз халықаралық коммерциялық мәмілелерді жүзеге асыру кезінде шетелдік лауазымды тұлғаларға пара беруге қарсы күрес жөніндегі ЭЫДҰ Конвенциясына қосылуға бағытталған.
Бұл құқықтық көмек көрсету, қылмыскерлерді экстрадициялау, заңсыз активтерді қайтару мәселелері бойынша ынтымақтастықты нығайтуға мүмкіндік береді және шет елдердің құқық қорғау органдарымен тиімді өзара іс-қимыл жасау үшін негіз жасайды.
