Нұр-Сұлтан, BAQ.KZ. Қарағанды облысы Бұқар жырау ауданындағы үш ауылдың жылқысына күзден бері қасқыр қырғидай тиіп жатыр, , деп хабарлады КТК арнасы.
Осы күнге дейін 50-ден аса жылқыны жайратқан жыртқыштар адамнан қорқуды қойыпты. Сондықтан олар аңшылық инспекциясынан малды жайпап бара жатқан жыртқышты жоюға рұқсат беруін талап етіп отыр. Бірақ қасқырды қыруға болмайды екен.
Ақжар ауылының тұрғыны Мереке Дүйсембаев үш күн бұрын қасқыр тартқан екі жабағысын қораға алған. Сандарынан кесек ет жұлынған жануарлар жасып қалғандай. Қайта бұлар аман құтылған. Әйтпесе, күзден бері үйірде жүрген 15 шақты Қамбар ата тұқымы далада жайрап қалыпты, - делінген сюжетте.
Күні-түні жылқының соңында жүре алмаймыз ғой. Ол жарықтық түнде жайылады. Таңертең барсақ, жайрап жатады, желінген не тартылған. Таңертең естідік, көрші ауылдан кәдімгі грейдердің қасында жеп жатыр дейді. Мұндай 3-4 жыл бұрын, тіпті 10-15 жыл болған жоқ. Болды ғой енді, бірақ дәл мұндай қатты болмаған еді, - дейді Ақжар ауылының тұрғыны Мереке Дүйсембаев.
Ауыл тұрғындары иен далада өлекселерді күн ара табады. Әсіресе, боранды күні құтыратын қасқырлар жылқының кеңірдегін қиып, жарып кете береді екен. Ал азу тістен сытылып шыққандарды иелері қораға қамап, ем-домын жасап жүр. Олардың айтуынша, маңайдағы қасқыр азаймай, мәселе түбегейлі шешілмейді. Өздері қырып салайын десе, рұқсаттары жоқ. Сондықтан өңірге кәсіби аңшылар тартылса екен дейді.
Бізге көмек керек, келсін, аңшыларды жіберсін. Рұқсатын берсін. Халық боп атпен шығамыз. Біз осы малға қарап отырмыз. Бір-екі малымызды жеп қояды. Бір-екеуін болса да атып, азайту керек, - дейді Ақжар ауылының тұрғыны Баткен Сейітов.
Орман шаруашылығы испекциясының мамандарының сөзінше, қасқырға аңшылық жасау заңға қайшы. Өйткені жыртқыштың саны жыл сайын азайып жатыр. Тек қана саны артып, малға шауып жатқан өңірлерде ғана атуға болады. Биыл Қарағанды облысына 39, оның ішінде Бұқар жырау ауданында 16 қасқырдың көзін жоюға рұқсат берілген.
Қасқырды жаппай қыра берсек, жақын болашақта экологиялық апатқа ұшырауымыз мүмкін. Сондықтан оның санын сәл азайтып отыруға ғана рұқсат етіледі. Биылға 16 қасқырға ғана рұқсат болды. Сондықтан ауыл тұрғындары малына сақ болып, келесі жылды күтуіне тура келеді. Көзі құртылатын қасқыр саны анықталғанда, кәсіби аңшыларға рұқсат қағаздары беріледі, - деді Қарағанды облыстық орман шаруашылығы және хайуанаттар әлемін қорғау испекциясының бөлім бастығы Евгений Протас.
Тұрғындардың айтуынша, қасқырлар жазда Баянауыл және Қарқаралы аудандарында болған дала өртінен ауып келген. Қазір жыртқыштар жайлаған өңір осы екі өрттің ортасында орналасқан. Бұл болжамды мамандар да жоққа шығармайды. Десе де, құзырлы органдар "ауыл тұрғындарын қасқырдан арашалауға қауқарымыз жетпейді" деп отыр.
Қыс түссе, ақжарлықтар қоршауда қалғандай күй кешеді. Осы мезгілде ауылда жарық жиі сөніп жолдарын қар басады. Салдарынан негізгі жолдан ауылға дейінгі 5 шақырым жерді жаяу жүріп өтуге тура келеді екен. Сондықтан аш қасқырлар "адамға да шаба ма?" деген қауіп төнді дейді тұрғындар.
