Павлодарлық полицейлер заңсыз аң аулау фактісін тоқтатты, деп хабарлайды BAQ.KZ Polisia.kz сілтеме жасап.
Полицейлер Екібастұз ауылдық округінің Ақши бөлімшесінің жанындағы дала алқабын патрульдеу кезінде еліктің өлексесін тапты.
Сонымен полицейлердің назарын Captiva Chevrolet автокөлігі аударды, оның жанында үш адам және екі жануардың сойылған өлекселері болды.
Автокөлікті тексеру кезінде ИЖ-27е 16 калибрлі екі ұңғылы мылтық табылды. Қару иесі тексеру кезінде қару құқығын растай алмады, өйткені оның құжаттары болмады. Сонымен қатар оның еліктерді атуға рұқсаты мен лицензиясы болған жоқ. 35 жастағы ер адам таныстарымен бірге далада уақыт өткізіп, аң аулауға кеткені анықталды. Күдіктілер елікті атқаннан кейін сол жерде сойған. Қазіргі уақытта Сібір елігінің өлекселері мен мылтықтар тәркіленді. Автокөлік арнайы айып тұрағына қойылды. Полиция тексеру жүргізіп жатыр, – деп атап өтті Павлодар облысының полиция департаменті.
Айта кету керек, мұндай фактілерді болдырмау үшін облыс полицейлері табиғатты қорғау полициясы мен мүдделі мемлекеттік ведомстволар қызметкерлерінің қатысуымен үнемі рейдтік іс-шаралар өткізеді.
