Бас жаңалықтар
Павлодар мектептерінің 25% жаратылыстану пәндерін ағылшын тілінде өткізеді
19 Наурыз 2019, 09:31 566

Павлодар мектептерінің 25% жаратылыстану пәндерін ағылшын тілінде өткізеді

Астана, BAQ.KZ. Павлодардың №7 жалпы орта білім беру мектебінде үш тілді оқыту бойынша «Үздік сабақ әзірлеу» жөніндегі І қалалық байқауы өтті, деп жазады pavlodarnews.kz.

Конкурстың мақсаты - педагогтарды жаратылыстану пәндерін ағылшын тілінде оқыту тәжірибесін жетілдіруге ынталандыру. Қалалық білім беру бөлімінің көптілділік жөніндегі әдіскері Назира Сәбитованың айтуынша, байқауға қаламыздағы барлығы дерлік мектептердің мұғалімдері қатысты.

«Бұл байқау қаламызда алғаш рет өткізіліп отыр. Конкурсқа жалпы саны 83 жұмыс келіп түсті. Физика, химия, биология және информатика пәндерін ағылшынша оқыту бойынша әзірленген сабақтарды облыс орталығындағы мектептер директорларының орынбасарларынан құрылған арнайы комиссия бағалайды», - дейді Назира Сәбитова.

Келіп түскен жұмыстардың 26-сы - биология пәні бойынша, 19-ы - информатика бойынша. Комиссия құрамында жұмыстардың пәндік мазмұны мен оның ағылшын тіліндегі дұрыстығын бағалайтын мамандар бар. Қалалық білім беру бөлімі өкілдерінің айтуларынша, үздік үш орынға ие болғандар дипломдармен марапатталады. Оған қоса, конкурсанттар «Үздік SMART-сабақ», «Үздік CLIL-сабақ», «Үздік ІТ-сабақ», «Тілдік емес пәндер ішінде ағылшын тіліндегі үздік жоба», «Жас ұрпақ», «Сабақтың үздік мазмұны» секілді номинациялар бойынша өз бағасын алады.

Сонымен қатар, таңдалып алынған үздік жұмыстар көптілде оқытудың арнайы деректер базасына енгізіледі. Бұл жинақ барлық мектептерге таратылады.

«Қазіргі кезде қаламыздағы мектептерде жаратылыстану пәндерінің шамамен 25%-ы пилоттық режимде ағылшын тілінде оқытылады. Жоспарға сәйкес, 2019-2020 оқу жылында кейбір мектептердегі 10-11 сыныптар бұл пәндерді толығымен ағылшынша оқи бастайды. Осы мақсатқа жету үшін, бүгінде қаламызда 146 мұғалім оқытудан өтіп, ағылшын тілін меңгеру бойынша В1, В2, С1 дәрежесіне ие болды», - дейді Н.Сәбитова.

Сізден жаңалық