Бас жаңалықтар
Атырауда "Мұнайшы" стадионының футбол алаңы жаңартылады
07 Мамыр 2019, 15:05 628

Атырауда "Мұнайшы" стадионының футбол алаңы жаңартылады

Нұр-Сұлтан, BAQ.KZ. Атырау облысының әкімі спорт нысанындағы жұмыстардың барысын инспекциялап, мердігер ұйымның өкілдермен сөйлесті. Бұл туралы Атырау облысы өңірлік коммуникациялар қызметі хабарлады.


Қазіргі кезде табиғи жабындыны жасанды жабынмен алмастыру жұмыстары аяқталуда. "Мұнайшы" стадионында соңғы үлгідегі газон төсеу ағымдағы жылдың наурыз айында басталып, қазір жұмыстар 80% көлемде атқарылды. 

Атырау облысы спорт және дене шынықтыру басқармасының ақпараты бойынша, жерді тегістеу кезінде қандай да болмасын сызаттар мен қиғаштықтарды болдырмау мақсатында, жобаның алғашқы кезеңінде геологиялық және геодезиялық жұмыстар жүргізілді.

"Футбол алаңының астындағы дренаждық табанды жасау үшін қалыңдығы 30 см нығыздалған балласт, қалыңдығы 20 сантиметрлік 5-20 фракциясындағы нығыздалған қиыршық тас төгіледі және нығыздалған жағдайда 10 сантиметрлік елем жасалады. Содан соң, алаңға Taishan компаниясының жасанды газоны төселеді, оған 18 кг кварц құмы және 10 кг SBR резенке түйіршігі төгіледі", - деп баяндады "GAZ stroy montazh KZ" ЖШС-нің бас директоры Мұхтар Бақыт.

Алаңның аумағы 5 метрге ұлғайтылды, сөйтіп, ол енді УЕФА-ның стандарттарына толықтай сәйкес келеді. Жабынды ауыстыру жұмыстары барысында нысанға 6 мың текше метрге жуық инертті материалдар әкелінді, төсеу жұмыстарына 22 жұмысшы тартылды. 

Спорт және дене шынықтыру басқармасының басшысы Ринат Ибрагимовтың айтуынша, бірнеше жыл жатқан бұрынғы табиғи газон беті тегіс емес және басқа да олқылықтарына байланысты футболшыларға қолайсыз болған еді. Енді, инновациялық жабынның арқасында атыраулық спортшылардың ойын сапасы айтарлықтай жақсаруы тиіс. Спорттық нысанда болған Атырау облысының әкімі Нұрлан Ноғаев осындай сенім білдірді.



"Стадионның жабынын ауыстыру жұмыстары уақтылы және сапалы аяқталуы тиіс. Футболшылардың жаттығуы және халықаралық деңгейдегі ойындарды өткізуі үшін лайықты орын болуы керек. Біздің спортшыларымыздың ойын сапасы алаңның сапасына тікелей тәуелді, команданың турнирлік кестеде жылжуы да осыған байланысты" ,– деді облыс әкімі мердігерлерге.

Атап өтейік, "Мұнайшы" стадионы 1950 жылы ашылған, сыйымдылығы – 8 690 адам. Газоны жаңартылғаннан кейін стадионның аумағы 110 да 70 метрді құрап, УЕФА-ның стандарттарына сәйкес болады.

Фото: дереккөз
Загрузка...

Сізден жаңалық