Бас жаңалықтар
Дәрі-дәрмекті 6 есе қымбатқа сатқандар ұсталды
06 Шілде 2020, 15:13 613

Дәрі-дәрмекті 6 есе қымбатқа сатқандар ұсталды

Нұр-Сұлтан, BAQ.KZ. ҚР Президенті Қ.Тоқаевтың тапсырмасы бойынша Ішкі істер министрлігі дәрі-дәрмекті жоғары бағамен сатудың алдын алу мақсатында жергілікті рейдтік іс-шаралар өткізді, деп хабарлады ведомствоның баспасөз қызметі. 

Тексерулердің мақсаты - карантин уақытында қажетті дәрі-дәрмектердің жетіспеушілігін пайдаланып, жоғары сұранысқа ие болған респираторлық вирустық аурулардан емдеуге арналған дәрі-дәрмектерді жоғары бағамен сатқан дәріхана қызметкерлері мен азаматтарды анықтау. Рейд барысында дәрі-дәрмектерді жаппай сатып алуды ұйымдастырған адамдар анықталды. Олар дәрі-дәрмектің жасанды тапшылығын тудырып, кейін дәрілерді нақты құнынан бірнеше есе артық бағамен қайта сатқан, - делінген хабарламада. 

Дәрі-дәрмектерді қайта сатудың көптеген фактілері еліміздің барлық өңірінде анықталды. Кәсіпкер азаматтар дәрі-дәрмектерді "сөреден" сатып алып, фискалдық чектерді шығармай сатқан. Салдарынан адамдар дәрілерді қымбат бағаға алуға мәжбүр болған.

Мәселен, Нұр-Сұлтан қаласында полицейлер қорғаныс құралдарын заңсыз сатудың жолын кесті. Жергілікті тұрғыннан медициналық маскалар, комбинезондар, термометрлер, медициналық көзілдіріктер мен антисептикалық құралдар тәркіленді. 

Сонымен қатар, әйел адам интернет-ресурстардағы хабарландыру арқылы "Парацетамол", "Ингавирин", "Цефтриаксон", "Азитромицин" сияқты аса қажетті дәрі-дәрмектерді заңсыз сатқан. Нұр-Сұлтан қаласындағы ОСО-ның бірінің тұрағында ер адам ұсталды, оның автокөлігінен аталған дәрілік препараттары бар екі қорап табылды. 

Шымкент қаласында "Левомак" медициналық препаратын 12 000 теңгеге сатқан жергілікті тұрғын полицияға жеткізілді. Ол дәрі бағасын өз бағасынан 6 есе қымбатқа сатқан. Дәріханада провизор болып жұмыс істейтін Шымкент қаласының тағы бір тұрғыны "Дексаметазон-Аджио" препаратының ампулаларын 5 000 теңгеден сатқан, ал оның негізгі бағасы - 600 теңге. Түркістан облысында ер адам "Аскорбин қышқылын" 5 000 теңгеден сатқан, оның негізгі бағасы - 250 теңге. 

Баспасөз қызметінің хабарлауынша, осыған ұқсас фактілер Алматы қаласында, Ақмола, Ақтөбе, Атырау, Шығыс Қазақстан, Жамбыл, Батыс Қазақстан облыстарында анықталды. Рейдтік іс-шаралардың бірінші күні полицияға барлығы 21 адам жеткізілді, олардан 3500-ден астам дәрілік зат тәркіленді, оның ішінде  "Ацетилсалицил қышқылы" - 2100 орам, "Парацетамол" - 589 орам,"Цефтриаксон" - 230 ампула, сондай-ақ 17 800 медициналық маска, бір рет қолданылатын 60 қолғап, 105 қорғаныс халаты (комбинезондар), 80 қорғаныс көзілдірігі, 79 термометр және 100-ден астам антисептикалық құрал (300 литр).

Барлық анықталған фактілер бойынша қолданыстағы заңнамаға сәйкес құқықтық баға берілетін болады. Ішкі істер министрлігі дәрі-дәрмектерді заңсыз сатуға тап болған азаматтарды, сондай-ақ, мұндай фактілер анықталған жағдайда жақын жердегі аумақтық полиция бөлімшелеріне немесе 102 және 112 телефондары арқылы хабарлауға шақырады. Рейдтік іс-шаралар жалғасуда, - деп хабарлады баспасөз қызметі.


Фото: ашық дереккөз
Загрузка...