Қазақстандық мәнерлеп сырғанаушы Михаил Шайдоров бұдан былай Олимпиада ойындарына дайындалған бапкері Алексей Урмановпен жұмыс істемейді. Бапкермен жасалған келісімшарт бұзылып, спортшы жаңа олимпиадалық циклге кірісті. Бұл туралы Туризм және спорт министрі Ербол Мырзабосынов Орталық коммуникациялар қызметінде өткен брифингте мәлімдеді, деп хабарлайды BAQ.KZ тілшісі.
Министр Алексей Урмановқа Шайдоров командасымен үш жыл бойы атқарған жұмысы үшін алғыс айтып, оның алдағы уақытта да жас қазақстандық мәнерлеп сырғанаушылармен жұмысын жалғастыратынына үміт білдірді.
Біз өз тарапымыздан Алексей Урмановқа зор алғыс айтқымыз келеді. Ол – Олимпиада алтынын жеңіп алған және Олимпиада чемпионын дайындауға көмектескен адам, – деді Ербол Мырзабосынов журналистердің сұрағына жауап бере отырып.
Министрдің айтуынша, Михаил Шайдоров жаңа олимпиадалық циклге дайындықты бастаған. Жыл басынан бері мәнерлеп сырғанаушы 13 оқу-жаттығу жиынын өткізіп, бірнеше жарысқа қатысқан.
Сондай-ақ министр спортшының алдағы жарыстарға дайындалу және жаңа элементтерді меңгеру үшін өз командасын таңдауға құқылы екенін атап өтті.
Еске салайық, 14 ақпанда Михаил Шайдоров Италияда өткен Milano Cortina 2026 қысқы Олимпиада ойындарында ерлер арасындағы жекелей сырғанаудан
алтын медаль жеңіп алды.
Ол қысқа және еркін бағдарламалардың қорытындысы бойынша 291,58 ұпай жинап, жапониялық Юма Кагияма (күміс) мен Шун Сатоны (қола) артта қалдырды. Бұл Қазақстан үшін тарихи жеңіс болды. Ол мәнерлеп сырғанаудан тұңғыш Олимпиада алтынын иеленді.
Сондай-ақ, Михаил Шайдоров Братиславада өткен ISU Challenger сериясындағы Memorial Ondrej Nepela турнирінде қола жүлдеге ие болды.
Спортшының әлемдік рейтингте екінші орынға көтерілгенін хабарладық.