МӘМС-тің 17,5 млн теңгесін жымқырды деген күдікпен Ақтаудағы филиалының басшысы ұсталды, деп хабарлайды BAQ.KZ atamekenbusinees-ке сілтеме жасап.
Ақтаудағы мемлекеттік әлеуметтік-медициналық сақтандыру қоры филиалының басшысы Руслан Бектібаевтың 2 айдан бері қамауда отырғаны белгілі болды.
Ол қордан 17,5 млн теңге жымқырды деген күдікке іліккен. Маңғыстау облысының прокуроры Руфат Құттықовтың, Ladakz порталына берген мәліметінше, Бектібаев пен бірге бұл істе, күдіктілер қатарында жеке медициналық фирманың директоры да бар.
Ол қор басшысымен тегін медициналық көмек шеңберінде, медициналық қызметтерді сатып алуға шарт жасасқан. Нәтижесінде Денсаулық сақтау министрлігінің базасына, емделуге немесе дәрігердің кеңесіне жүгінген адамдар туралы жалған мәліметтер берген.
Руслан Бектібаевтың кінәсі дәлелденсе мүлкі тәркіленіп, 7 жылдан 12 жылға дейін бас бостандығынан айырылуы мүмкін.
