Мәдени демалыс: Елордада осы аптада қандай іс-шаралар өтеді?

18 Сәуір 2022, 22:35
1643
Бөлісу:
Мәдени демалыс: Елордада осы аптада қандай іс-шаралар өтеді?

Нұр-Сұлтан, BAQ.KZ. Апта сайын мәдениет мекемелері елорда тұрғындары мен қонақтары үшін қызықты және түрлі жанрлық іс-шаралар, мерекелік бағдарламалар әзірлейді. Осы аптада қойылымдар, аспаптық ансамбльдердің концерттері, көрмелер, дәрістер және тағы басқалары өтеді, деп хабарлайды елорда әкімдігінің ресми сайты.

Е.Рахмадиев атындағы Мемлекеттік академиялық филармония 19 сәуір күні сағат 19:00-де көрермендерді «Астана Операдағы» К.Байсейітованың Камералық залына, «Уақыт айнасы» хор музыкасының концертіне шақырады. 22 сәуірде сағат 19:00-де филармония әртістері Кәкімбек Салықовтың 90 жылдығына арналған «Жез киік» концертінде өнер көрсетеді. Күндіз мұнда «Le Printemps Romantique» симфониялық оркестрінің концерті өтеді.

«Жастар» сарайы осы аптада әлеуметтік желідегі парақшаларында өткен жылдардағы «Балбөбек» ашық қалалық балалар және жасөспірімдер шығармашылығы фестиваліне қатысушылардың шығармашылық нөмірлерін, сондай-ақ «Шебер өнер» жобасы аясында кәсіби ұжымдардың шығармашылығын жариялайды.

Музыкалық жас көрермен театры екі қойылым ұсынады. 21 және 22 сәуірде сағат 19:00-де көрермендер «Шанель» деректі драмасын, 24 сәуірде сағат 18:00-де «Шәмші» мюзиклін тамашалай алады.

М. Горький атындағы Мемлекеттік академиялық орыс драма театры 19 сәуір күні сағат 19:00-де В.Гуркиннің «Народная кадриль» лирикалық комедиясын, ал кешке Н.Гогольдің «Гоголь.Петербург» сахналық қойылымын жоспарлап отыр. 23 сәуір күні сағат 11:00-де горькийлықтар жас көрермендер үшін А.Болдиновтың «Приключения Аистенка» ертегісін қояды. Сол күні кешке В.Шукшиннің «Светлые думы» әңгімесінен сахналық қойылымды көруге болады.

Қуыршақ театрында 22 сәуір сағат 16:00-де және 23-24 сәуірде 12:00, 14:00, 16:00 уақытында халық эпосының желісі бойынша Қ.Ежембектің «Ер Төстік» қойылымы өтеді.

22 сәуірде креативті индустрияны дамыту орталығы NOMAD City Hall-да лиганың бірінші кезеңін «Көңілді тапқырлар алаңы» ұйымдастырады, ал 23 және 24 сәуірде Шара Жиенқұлованың 110 жылдығына арналған хореографтар мен балетмейстерлердің «ҚАМАЖАЙ» республикалық конкурсын өткізеді.

«Жастар» театры 19 және 20 сәуірде С.Қасымбектің «Лифт» психологиялық драмасына шақырады. 21 сәуір күні сағат 11:00-де «Ұр тоқпақ» қазақ халық ертегісі, 23 сәуір сағат 19:00-де С.Раевтың «Жұмаққа қарай ұзақ жол» қойылымы, ал бірнеше сағаттан кейін Н.Оразалиннің «Қылкөпір» драмасы көрсетіледі. 24 сәуірде жастардың орындауында Ш.Айтматов, О. Бөкей, Р. Мұқанованың шығармалары негізінде «Ғасырдан да ұзақ» триптихін көруге болады.

Орталықтандырылған кітапханалар жүйесі күнделікті іс-шараларды мүмкіндігінше көп тарту үшін ұйымдастырады. 20 сәуір күні Орталық қалалық кітапхананың қызмет көрсету бөлімінде «Қазақтың біртуар әншісі Әміре Қашаубаев» атты слайд-презентация өтеді. Осы күні №2 бұқаралық кітапханада «Ән өнерінің саңғалы – Әміре» әдеби музыкалық сағаты, №2 балалар кітапханасында «Жүрегіме жол тартқан сүйікті өлкем» танымдық сағаты, №8 балалар кітапханасында «Зиянды әдеттер. Өмір бос өтіп кетпес үшін...» іс-шаралары өтеді. 21 сәуірде Орталық балалар мен жасөспірімдер кітапханасы оқырмандарды «Біз кітапханаға барамыз» танымдық сағатына шақырады. Сол күні түстен кейін Орталық қалалық кітапхананың қызмет көрсету бөлімі «Мұның бәрі ол туралы» викторинасын, №5 балалар кітапханасы – «Кітапты ашамын – әлемді ашамын» ақпараттық сағатын, №2 Балалар кітапханасы – «Ғажайыптардың ғажайыбы» ақпарат сабағын өткізеді. 23 сәуір күні № 10 бұқаралық кітапханада «Кітап – мәңгілік елдің құндылығы» атты әдеби марафон өтеді. 24 сәуір күні № 3 көпшілік кітапханасы «Өнегеге толы өмір» атты әдеби-көркем сағатқа шақырады.

Саяси қуғын-сүргін және тоталитаризм құрбандарының «АЛЖИР» мемориалды-мұражай кешені бүгін, 18 сәуірде «Сол бір қанды заман» онлайн дәрісін, ал 20 сәуірде «Тағдыр тоғыстырушы жіп» тақырыбында дәріс өткізеді.

Осы аптада Сәкен Сейфуллин музейі әлеуметтік желілердегі аккаунттарында «Сәкен Сейфуллин 1964 ж.» деректі фильмінің бірінші бөлімін көрсетеді, сонымен қатар дәстүрлі бейне турын өткізеді.

19 сәуірде «Мәңгілік Ел» салтанат қақпасында «Қазыбек бидің туғанына 355 жыл» онлайн-сабағы өтеді.

Өзгелердің жаңалығы