Нұр-Сұлтан, BAQ.KZ. Қарағанды облысында елік атқан браконьерлер ұсталды, деп хабарлайды Polisia.kz.
Қарағанды облысы Абай аудандық бөлімінің Топар полиция бөлімшесінің қызметкерлері рейдтік іс-шара өткізді.
Полицейлер сағат 15:30 шамасында елді мекендердің бірінің аумағында 41 жастағы жүргізуші басқарған көлікті тоқтатқан. Көлікте 16 мен 44 жас аралығындағы төрт жолаушы болған.
Полицейлер көлікті тексеру кезінде екі еліктің еті табылған. Ұсталғандар – барлығы Шахтинск қаласының тұрғыны. Күдіктілерден үш бірлік тегіс ұңғылы қару алынды. Қылмыстық кодексінің 337-бабы (Заңсыз аңшылық) бойынша қылмыстық іс қозғалды. Қазіргі уақытта тергеу амалдары жүріп жатыр.
