Елордалық өрт сөндірушілер өрт кезінде 4 ересек және бір баланы құтқарды. Бұл туралы Астана қаласы ТЖД баспасөз қызметі ақпарат таратты, деп хабарлайды BAQ.KZ.
9 тамызда сағат 13.54-те Астана қаласы ТЖД Өрт сөндіру бөлімшелері Ақан сері көшесіндегі паркингте автокөліктің жанып жатқандығы туралы кезекті шақыруға шықты. Өрт сөндірушілер келгеннен кейін 6 минуттан кейін тұрғын үй кешенінің паркингінде Range Rover маркалы автомобиль жанып, қатты түтін пайда болғаны анықталды, - делінген баспасөз хабарламасында.
Өрт сөндіру кезінде елордалық өрт сөндірушілер 5 адам, оның ішінде 1 баланы құтқарды. 150 адам эвакуацияланды, оның ішінде 30 бала бар.
Құрбандар мен зардап шеккендер жоқ. Өрт сөндірушілердің күшімен сағат 14.40-та өрт сөндірілді.
