Бұл туралы көлік министрі Марат Қарабаев Мәжілістің жалпы отырысында депутаттың сауалына жауап беру барысында айтты, деп хабарлайды BAQ.KZ тілшісі.
Қазір жалпы Қазақстан бойынша 2567 вагон жұмыс істеп тұр. Олардың тозу деңгейі – 48 пайыз. Сіз «оларды қашан жаңартамыз» деп сұрақ қойдыңыз. Биыл 50 жаңа вагон алдық. Қазір келісімшартқа қол қойдық. Келесі жылы тағы 100 вагон болады, қосымша 157 вагонды алуды пысықтап жатырмыз, - деді министр.
Министрдің есебіне қарасақ, биыл және келесі жылы 304 вагон болады. Бұдан басқа тағы қол қойылған 2025 жылдан бастап Еуропадағы ең заманауи Stadler (Штадлер) компаниясының жалпы саны 537 вагонын алуды жоспарлап отыр.
2567 вагонға қосымша (әрине оның тозу деңгейі бар) 804 жаңа вагон алуға қазір қол қойылып отыр. Қосымша вагон алу мәселесін әлі пысықтаймыз. Нәтижесінде қазір (вагондардың) орташа жасы 18 болса, қолымыздағы бар келісімшартқа сәйкес (вагондардың орташа жасы) 13 жасқа дейін төмендейді. Бұл қол қойылған нақты келісімшарттар. Одан басқа тағы қосымша келісімшарттарды пысықтап жатырмыз, - деді көлік министрі Марат Қарабаев.
