Экстремизм мен терроризмге қарсы іс-қимыл бойынша БҰҰ өкілдерімен кездесу өтті

26 Сәуір 2022, 20:40
1233
Бөлісу:
Экстремизм мен терроризмге қарсы іс-қимыл бойынша БҰҰ өкілдерімен кездесу өтті

Нұр-Сұлтан, BAQ.KZ. Ақпарат және қоғамдық даму вице-министрі Серік Егізбаев БҰҰ-ның Есірткі және қылмыс бойынша басқармасының Орталық Азиядағы өңірлік өкілі – Ашита Митталмен, сондай-ақ БҰҰ ЕҚБ өзге де өкілдерімен кездесу өткізді, деп хабарлайды министрліктің баспасөз қызметі.

Тараптар экстремизм мен терроризмге қарсы іс-қимыл саласындағы ынтымақтастық мәселелерін талқылады.

С.Егізбаев министрліктің дін саласындағы алдын алу жұмыстары туралы, оның ішінде террористік және экстремистік қылмыстарға қатысқаны үшін сотталған тұлғалармен оңалту шаралары туралы айтып өтті.

Өз кезегінде, А.Миттал Қазақстанның діни экстремизмнің алдын алу саласындағы оңтайлы тәжірибесін атап өтіп, ағымдағы жылғы мамырда өтетін «Бас бостандығынан айыру мекемелерінен босатылған соң сотталғандарды әлеуметтік қайта интеграциялаудағы азаматтық қоғамның рөлі» атты форумға қатысып, құттықтау сөз сөйлеуге шақырды.

Кездесу барысында жастарды радикалды идеологияның әсерінен алыстату, интернеттегі контрнасихат жұмыстары, экстремистік және террористік бағыттағы қылмыстар үшін сотталғандармен жұмыс бойынша қолдау көрсету, сондай-ақ БҰҰ ЕҚБ-мен ынтымақтастықты кеңейтіп, оның ішінде террористік белсенді аймақтардан қайтарылған азаматтарды оңалту және қайта интеграциялау аясында азаматтық секторды дамыту мәселелері  бойынша тәжірибе алмасу болып өтті.

Өзгелердің жаңалығы