Нұр-Cұлтан, BAQ.KZ тілшісі. Елордадағы Ұлттық музейде мемлекет және қоғам қайраткері, Қазақстанның еңбек сіңірген қызметкері, профессор Төлеубек Мұқашевтың «Балалық шаққа саяхат» атты жеке көрмесі өтіп жатыр.
2014-2020 жылдар аралығында Сенат депутаты болған Төлеубек Мұқашев зейнетке шыққан соң бұрыннан армандап жүрген алғашқы көрмесін өткізуді қолға алған екен.
Бұл көрме өзіміз туып-өскен жерді, табиғатымызды, балалық шақтың алаңсыз уақытын ұмытып, күнделікті қарбаласпен өмірін өткізіп жатқан жандарға еске түсіру мақсатында ұйымдастырылды. Жас кезімнен бастап әрдайым сурет салып жүрдім. Қазір зейнетке шығып, бос уақытым көбейген соң осындай көрме өткізуді қолға алдым,- дейді экс-сенатор.
Ол сурет арқылы ойындағысын, жеткізгісі келетінін айтты.
Алғаш рет осындай көрме ұйымдастырып отырмын.Шабытымнан туындаған сүйіспеншілікті басқаларға, келе жатқан ұрпаққа көрсетсем деймін. Көрме оларды табиғатты құрметтеуге, туған жерді бағалауға насихаттайды деген ойдамын,-дейді профессор.
Елорда тұрғындары мен қонақтары оны екі ай бойы тамашалай алады.
