"Допша" домалап жүр. Қарақат Әбден жыр болған жол мәселесін көтерді

27 Наурыз 2024, 12:48
577
Бөлісу:
"Допша" домалап жүр. Қарақат Әбден жыр болған жол мәселесін көтерді
Фото: BAQ.KZ -архив

Мәжіліс депутаты Қарақат Әбден Премьер-министр Олжас Бектеновке сауал жолдап, жол құрылысы мәселесін көтерді, деп хабарлайды BAQ.KZ тілшісі.

Ұлытау облысына іссапармен барып, сонда көрген-білген біраз мәселе осы мінберде баяндалған еді. Алайда “жоспарлануда”, “қолға алынады” деген сияқты жалтарма жауаптар берілді. Нақты шешім жоқ жерде мәселе қордалана береді. “Ұлт ұясы” деп, Ұлытау облысын жаңа құрып, оны қарқынды дамыту керек деген Мемлекет басшысының тапсырмасы тұсында жайбасарлыққа салыну жөн болмас, - деп айтты Қарақат Әбден.

Депутат атап өткендей, Қызылорда-Жезқазған, Қарағанды-Жезқазған тас жолдарының “жыры” таусылар емес. Мысалы, қазір көктем уақытында құрылыстың нағыз қызатын, әрі қолайлы уақыты. Жобалық-сметалық құжаттамамен айналысып жүргенде, жол салудың маусымы тағы да өтіп кетеді.

Қызылорда-Жезқазған жолының жайы маған бала кезден таныс. Бұл мәселе сол кезде өзекті еді, қарап тұрсаңыз, қанша жыл өтсе де, “баяғы жартас – сол жартас” болып тұр. Депутаттық сауалыма келген жауаптың барысы осыны аңғартады. Мәселен, “Жезқазған-Қызылорда” автомобиль жолы бойынша мердігер компаниялардың өтінімдері әлі бағалану стадиясында. Құжаттардың рәсімделуі “Госэкспертиза” мен “ҚазАвтоЖол” арасында ілгері-кейін “допша” домалап жүр. Ал “Жезқазған-Қарағанды” тас жолына қатысты мердігерлік компанияларды анықтау әлі жоспарланып отырғанға ұқсайды. Демек, нақты іске қашан көшіп, құрылыстың қашан басталатыны белгісіз, - дейді ол.

Халық өңірлік басшылықтың өз уақытында қимылдамауына, жайбасарлығына наразы, бірақ аталған бағыттағы автомобиль жолдарының салынуы, бақылануы облысы әкімшілігі емес тікелей Көлік министрлігіне қарайды.

Сондықтан бұл мәселеге аталған ведомство басшылары зер салып, құжаттама ісінің, яғни өтінімдердің қаралуы, бағалануы, расталуы, қаржының бөлінуі сияқты ұзын-сонар процестер қатаң бақылану керек. Талап болу керек. Сұрауы болмаса істің мәні кетіп қалады. Үнемі қадағаланса, бір қозғалыс болары анық. Әйтпесе, бұл тас жолдар қыршын кеткен тағдырлардың “ескерткішіне” айналғаны қашан? Жезқазған-Қарағанды тасжолы – кеңестік кезеңнен күрделі жөндеу көрмеген, жиектері әбден мүжіліп, тарылып барады. Міне, содан бұл жол “қанды жер” аталып кеткені баршаға аян. Дәл осы жолда 2023 жылы 129 жол көлік оқиғасы тіркеліп, 167 адам дене жарақатын алған, 37-сі қаза тапқан. Ал биылдың 2 айының өзінде 23 жол көлік оқиғасы болып, 37 адам жарақаттанып, 2 адам мерт болды. Тас жолдың “жыры” таусылғанша, әлі қанша жан тауқымет тартады? Кім білсін? – деп мәселені айтты Қарақат Әбден.

Әбден айтқандай, үшінші құрылтай өткенде Президент Қасым-Жомарт Тоқаев: “Жол салу және оны жөндеу жұмыстары экономиканың дамуына тың серпін береді” деп атап көрсетті.

Жол болмаса, қандай серпін, қандай даму болады? Жолымыздың түрі анау болса, қандай қарқынды экономика, қандай табысты туризм күтеміз? Халықтың әл-ауқаты осы жолға байланысты. Облысаралық жолдардың сапасыздығы өңірдің дамуына, инвестицияның тартылуына кедергі, сондай-ақ жол тасымалының қиындығын себеп қылып, азық-түлік те қымбаттайды. Бұл тағы қарапайым халықтың қалтасын қағатыны белгілі. Ұлытау облысының күретамыры осы жолдар. Сондықтан Президенттің артқан сенімі мен халықтың “алақайлаған” қуанышы сол “жолда” қалып қоймасын?! - дейді мәжілісмен.

Депутат Қарақат Әбден Қызылорда-Жезқазған, Қарағанды-Жезқазған тас жолдарының салынуы мен жөнделуіне сараптама жасалып, нақтыланған жұмыс жоспарын беруді сұрады.

Мынадай мәселелерді қолға алуды ұсынды:

  • қаржының бөлінуі;
  • анықталған мердігер компаниялар;
  • келісімшартқа отыруы;
  • келісімшарт бойынша белгіленген уақыт;

Сондай-ақ депутаттар жұмыс жоспары бойынша істің талап етілуін қадағалауды назарға алуды сұрады.

Өзгелердің жаңалығы