Бозжырадағы қонақ үй табиғи қаумал аумағынан тыс жерде салынады – министр

12 Желтоқсан 2020, 14:20
1580
Бөлісу:
Бозжырадағы қонақ үй табиғи қаумал аумағынан тыс жерде салынады – министр

Нұр-Сұлтан, BAQ.KZ. ҚР Экология, геология және табиғи ресурстар министрі Бозжыра экологиялық туризмді дамыту мәселесі талқыланған кездесу қорытындысы туралы хабарлады. 

Мемлекет басшысының Бозжыра шатқалында қонақ үй салу жобасын қайта қарау туралы тапсырмасына сәйкес, Ақтау қаласында ғалымдармен, биологтармен, шетелдік сарапшылармен, жергілікті эколбелсенділермен және қоғам қайраткерлерімен кездесу өткіздік. Барлығы туристік нысан тұрғызу өңір үшін аса маңызды деген ортақ ой айтты, - деп жазды ол Twitter парақшасында.

Министр жобаның әлеуетін бағалап, кеңестерін беру үшін тәжірибелі сарапшылар мен ғалымдарды Бозжыраға алып барғандарын атап өтті.

Бірақ туризмді дамыту мен Бозжыра сияқты уникалды табиғи нысанның экожүйесін сақтаудың арасында тепе-теңдік болу керек. Жобаның әлеуетін бағалап, кеңестерін беру үшін тәжірибелі сарапшылар мен ғалымдарды Бозжыраға алып бардық, - деді министр.

Оның сөзінше, жергілікті қоғам белсенділері ғалымдармен бірге қонақ үй салу өңірдің туризмін дамытып, жаңа жұмыс орындарын ашу үшін керек деген ойды алға тартқан.  

Сондықтан тұрғындар мен ғалымдардың, қоғам өкілдерінің ұсынысымен қонақ үй орны Жабайұшқан қаумалының сыртына ауыстырылады. Инвестор компания өкілдері өз тарапынан жобаны жүзеге асыратын орынды қаумалдан тыс жерден таңдауға дайын екендерін жеткізді, - деп хабарлады Мағзұм Мырзағалиев.

Еске салсақ, қараша айының ортасында Қазақстан Республикасының Президенті Қасым-Жомарт Тоқаев Маңғыстау облысындағы ерекше қорғалатын Бозжыра табиғат қорығына қонақ үй салуға қатысты тапсырма берген еді.
Өзгелердің жаңалығы