Аймағамбетов үш ауысымды мектеп үшін айыппұлды директорға емес, әкімдікке салуды ұсынды

17 Сәуір 2024, 11:26
369
Бөлісу:
Аймағамбетов үш ауысымды мектеп үшін айыппұлды директорға емес, әкімдікке салуды ұсынды
Фото: Арман Мухатов - архив

Мәжіліс депутаты Асхат Аймағамбетов мұндай ұсынысты палатаның жалпы отырысында айтты, деп хабарлайды BAQ.KZ тілшісі.

Депутаттың сөзінше, соттар бүгін мектеп директорларына немесе аурухана басшыларына айыппұл салғанда олардың мүмкіндіктері мен құзыреттілігін толық ескермейді.

Мысалы, санпинді бұзды деп мектеп үш ауысымды болса, онда айыппұл мектептің директорына салынады. Бірақ енді директор үш ауысымдылықты басына тілеп алған жоқ қой. Мектеп тиісті деңгейде салынбағаннан кейін дәл осындай жағдайға жетеді. Сондықтан мүмкін мұндай мәселеде айыппұл әкімдіктерге салыну керек шығар. Лаборатория, құрылғылар жетпесе, тағы да директорға жауапкершілік артылады. Бюджет болмағандықтан, ол құрылғыны сатып алмайды. Сондықтан Жоғарғы Соттың нормативті қаулысы керек деп санаймын. Айыппұл салғанда субъектінің мүмкіндігі мен осы мәселе әсер ете алуын қарау керек деп ойлаймын, - деді мәжілісмен.

Сонымен бірге Аймағамбетов дәрігерлердің де мәселесін көтерді.

Бүгін дәрігерлерді өзіне тән емес жұмысқа тартқаны, шамадан тыс есеп талап еткен үшін жауапкершілікке полиция тартады. ДСМ-нің комитеті осы мәселені қарастырсын деген ұсыныс болған. Бұл мәселеге қалай қарайсыз? - деп сұрады депутат Асхат Аймағамбетов.

Сот әкімшілігінің өкілі депутат көтерген мәселе өте өзекті екенін айтып, оны пысықтайтынын жеткізді.

Ал Ішкі істер вице-министрі Игорь Лепеха да бұл бастаманы қолдайтынын және оны жұмыс тобында жан-жақты талдауды ұсынды.

Мәжілісте Әділет министрі Азамат Есқараев "Қазақстан Республикасының Әкімшілік құқық бұзушылық туралы кодексіне өзгерістер мен толықтырулар енгізу туралы" заң жобасын бірінші оқылымда таныстырғанын еске сала кетейік.

Өзгелердің жаңалығы