Астананың жаңа әкімі қалалықтарды елорданы бірге дамытуға шақырды

Астананың жаңа әкімі қалалықтарды елорданы бірге дамытуға шақырды
695

Астана қаласының жаңа әкімі Жеңіс Қасымбек қала тұрғындарынан қаланы ары қарай дамыту үшін идеялар мен ұсыныстар күтетінін айтты, деп хабарлайды BAQ.KZ.

Қала мэрі бұл туралы өзінің Instagram-дағы парақшасында жазды.

Құрметті астаналықтар! Сіздермен жұмыс істеу – мен үшін үлкен мәртебе әрі үлкен жауапкершілік. Елордамызды ары қарай бірлесе дамытамыз. Астана – қашанда өзіне еріксіз баурап алатын, тартымды қала болып келеді. Сол сияқты Астананың өзіне тән сұлулығы мен өзіндік ерекше энергиясы бар. Қаламызды одан әрі жайлы да қолайлы ету үшін жұдырықтай жұмылып еңбек етеміз, - деді Қасымбек.

Жаңа әкім атап өткендей, қазіргі уақытта дүние жүзіндегі мегаполистердің алдында жаңа жаһандық сын-қатерлер мен міндеттер тұр. Астана да солардың қатарында. Экономикалық көрсеткіштер, кәсіпкерлікті дамыту, инфрақұрылым, қолжетімді әлеуметтік қызметтер – өз жұмысымызда қала өмірі үшін маңызы зор барлық саланы қамтимыз.

Қала тұрғындарының жайлы өмір сүруі үшін қолжетімді әлеуметтік тұрғын үйлер, мектептер, балабақшалар, медициналық нысандар және т.б. салуды әрі қарай да жалғастырамыз. Қала тұрғындарының саны, құрылыс көлемі жыл сайын өсіп келе жатқанын ескеріп, жылу, су және электрмен жабдықтау нысандарының қуатын ұлғайту бойынша жұмыс істейміз. Әлеуметтік желі – тиімді байланыс құралы. Біз үшін сіздердің пікірлеріңіз маңызды. Елордамызды ары қарай дамыту бойынша сіздерден ұсыныстар мен идеялар күтеміз, - деп жазды ол өзінің әлеуметтік желісінде.

Еске сала кетейік, кеше Жеңіс Махмұдұлы Қасымбек Астана қаласының әкімі лауазымына тағайындалған болатын.

Қысқа да нұсқа. Жазылыңыз telegram - ға
Өзгелердің жаңалығы