Ақтаудағы тұрғын үйлердің бірінде ер адам кішкентай балаларының көзінше әйелін соққыға жықты, деп хабарлайды BAQ.KZ.
Lada.kz сайтының мәліметінше, сұмдық жағдай үйдің кіреберісіне орнатылған камераның арқасында әшкере болған.
Видео: Lada.kz
Видеода ер адам әйелінің қолын қайырып, аузын жауып үйдің кіреберісіне кіргізгенін көруге болады.
Кейіннен ол әйелді босатып, жан-жағында адамдардың бар-жоғын қарайды.
Ешкімнің жоқтығына көз жеткізген ер адам әйеліне қайта бас салады.
Бұл ретте агрессор үйден адам шығып қалған соң ғана тоқтайды. Алайда зорлық-зомбылық лифтіде жалғасады.
Қуанышқа орай лифтіге мінген әйел оны қуып шығады.
Жантүршігерлік видеода әйелдің және оның балаларының жан ұшыра жылаған даусы, айқай-шу естіледі.
Аталған жайтқа қатысты Маңғыстау облысы Полиция департаментінің баспасөз қызметі түсініктеме берді. Айтуынша, агрессорға іздеу салынды.
Айта кетейік, 15 сәуірде ел Президенті Қасым-Жомарт Тоқаев әйелдердің құқықтары мен балалардың қауіпсіздігін қамтамасыз етуге бағытталған заңдарға қол қойған болатын. Дегенмен заң қабылданса да, отбасылық "тирандардың" құқыққа қайшы әрекеттері әлі де тыйылмай тұр.
