Ақтауда ер адамнан күшті әсер ететін заттардың ірі партиясы тәркіленді

«Қарасора-2026» жедел-профилактикалық іс-шарасы аясында Маңғыстау облысы Полиция департаментінің есірткі қылмысына қарсы іс-қимыл басқармасының қызметкерлері Ақтау қаласында күшті әсер ететін заттарды заңсыз сақтау және тасымалдау фактісін анықтады.

30 шілдеде жүргізілген жедел-іздестіру іс-шаралары барысында азамат ұсталды. Жеке тінту кезінде одан «Тропикамид» және «Прегабалин» күшті әсер ететін заттары анықталып, тәркіленді.

Сондай-ақ ұсталған азаматтың автокөлігін тінту барысында 82 құты «Тропикамид», 21 таблетка «Прегабалин» және сыртқы белгілері бойынша есірткі затына ұқсас ұнтақ тәрізді зат салынған бума тәркіленді, - деп хабарлады облытық Полиция департаменті.

Тәркіленген заттарға қатысты сот сараптамасы тағайындалды.

Аталған факті бойынша 2026 жылғы 30 шілдеде Қазақстан Республикасы Қылмыстық кодексінің 301-бабының 1-бөлігі бойынша сотқа дейінгі тергеп-тексеру басталды.

Бұдан бөлек, күшті әсер ететін затты қолдану фактісі бойынша азаматқа қатысты Қазақстан Республикасы Әкімшілік құқық бұзушылық туралы кодексінің 440-1-бабының 1-бөлігіне сәйкес әкімшілік хаттама толтырылды. Соттың қаулысымен оған 40 айлық есептік көрсеткіш мөлшерінде айыппұл түріндегі әкімшілік жаза тағайындалды, - делінген Маңғыстау облысы Полиция департаментінің хабарламасында.

Қазіргі уақытта қылмыстық іс бойынша оқиғаның барлық мән-жайларын анықтауға бағытталған қажетті тергеу әрекеттері жүргізілуде. Сотқа дейінгі тергеп-тексеру жалғасуда.

Еске сала кетейік, бұған дейін Алматыда екі келіден астам синтетикалық есірткі тәркіленген болатын.